«الشقيانين فى الحر»: «نفسنا نستريح.. زى المكن»

08:29 م | الخميس 02 يونيو 2016

كعادتهم، اجتمعوا فى وقت الظهيرة، لم تمنعهم الحرارة الشديدة من مواصلة عملهم، رغم بشاعة الطقس والتحذيرات التى تسببت فى تغيير مخططات البعض، والتراجع عن النزول إلى الشارع، استراحة لمدة دقائق كل نصف ساعة، كانت من نصيب ماكينة البناء فى الحر لتجنب تعطلها، راحة لا ينالها العمال، إذ يستمر عملهم رغم حرارة الجو، ولا أحد يسمع شكاواهم.

{long_qoute_1}

وفاة عامل نظافة تأثراً بحرارة الجو كان دافعاً لمحافظ الأقصر لمنع عمل عمال النظافة فى فترة الظهيرة، خاصة فى الأيام شديدة الحرارة، قرار إنسانى سمع عنه عمال البناء، فترحموا على حالهم، فلا محافظ لهم يأخذ بأيديهم أو يأتى لهم بحقوقهم، وأقلها من وجهة نظرهم «أننا نستريح زى المكن».

مجدى وأصدقاؤه خرجوا جميعاً فى اتجاه عملهم، أرزقية على الرصيف ينتظرون من يمد إليهم يد العمل، عمال البناء البسطاء لا يملكون رفاهية الاعتراض: «اللى بياخدنا بيشرط علينا الشغل حتى لو المكنة وقفت، وإحنا لو علينا مستعدين نشتغل فى أى جو عشان لقمة العيش، لو قعدنا يوم ولاّ صحتنا تعبت مابنلاقيش ناكل»، لا يمانع «مجدى» أن يحصل صاحب العمل على حقه: «بس إحنا هنعمل إيه، المكنة عملتها معانا إمبارح والزيت اللى بيشغلها فار، فقررنا نديها استراحة كل نص ساعة عشان حالنا مايوقفش، وإحنا علينا نتحمل ونشتغل بدالها».

«مجدى» لم يكن وحده فى الشقاء، «مجاهد أحمد» عامل بناء آخر، لا يمانع فى العمل طيلة اليوم رغم قسوة الطقس: «الرحمة لازم تيجى من اللى حواليك، وإحنا اللى زينا مش مكتوبة له الراحة، المكنة تستريح عشان بفلوس، لكن اللى زينا كتير، ولو واحد تعب فيه عشرة غيره»، كلما فكر مجاهد فى الراحة تذكر أسرته، فيعود للعمل: «هَمّ الشغل مقدور عليه، لكن الجوع محدش يستحمله».