أغرب محتوياتها: إبرة وخيط.. كيس زبالة.. شراب.. الشنطة دى فيها إيه؟.. مغارة على بابا

11:19 م | الاثنين 19 سبتمبر 2016

شنطة يد الفتاة هى عالمها الخاص، وهى الوحيدة التى تعرف ما بداخلها، ومن خلالها تستطيع أن تُحدّد شخصية الفتاة هل هى منظمة؟.. عملية؟.. تهتم بأدق التفاصيل؟.. «شنطتى لا تخلو من المناديل والبرفان ومفاتيحى والصن بلوك والمراية، دول أهم حاجة لازم أتأكد أنها موجودة فى شنطتى قبل ما أخرج، وممكن أحط حاجات بسيطة تانية زى مكياجى والبطاقة والفلوس ونضارة الشمس وممكن تذاكر ترام»، حسب سلمى خليفة، التى قالت إن شنطتها تحوى أيضاً أوراقاً كتبت فيها أشياء مهمة وتركتها فى الشنطة لحين استخدامها.

فيما قالت دعاء عادل، إنها لا تضع فى شنطتها أى أدوات أو أغراض غير مهمة: «ماباحبش آخد ميكاب معايا، باخد مراية ووايبس ومناديل عادية وبرفان وهاند فرى ومفاتيح ومحفظة، وممكن كتاب لو مشوار طويل وإزازة ميه ولبان». الحال نفسه بالنسبة إلى دعاء رضوان: «أنا باحط بجانب الحاجات العادية اللى بتحطها كل البنات، ورق منيو محلات مختلفة، كل ما آكل فى مطعم أحتفظ بالمنيو بتاعه فى شنطتى.. ماعرفش ليه؟». أما أشرقت حافظ، فتحوى شنطتها على أشياء مختلفة: «مسكن للآلام، شاحن موبايل، فلاشة، ميدالية مفاتيح، بالإضافة إلى كيس قمامة لوضع مخلفاتها فيه».

شنطة آية خالد، لا تخلو من ثلاث: شراب وطرحة واكسسوارات: «دى حاجات ضرورية ممكن أحتاجها فى أى وقت». دعاء فارس، تصف حقيبتها بأنها مغارة على بابا: «شنطتى فيها كل ما يحتاجه الأطفال من بامبرز وببرونة ودوا ولبس ووايبس ومناديل عادية، وممكن تلاقوا فى شنطتى فواتير كهرباء وغاز.. ليه ماعرفش؟».

«الإبرة والخيط»، أكثر ما تحرص أمانى على، على وجوده فى شنطتها، بجانب «التوك والمشط والاكسسوارات وطرحة زيادة وشيكولاتة وعصير وساندويتشات»، أما سارة يحيى، فتحوى شنطتها على نحو 4 شنط: «شنطة ميكاب، وشنطة فاضية كبيرة لو احتاجتها، وشنطة صغيرة خالص للفلوس الفضة، وشنطة لمبرد الضوافر والبرفان وفرشة الأسنان والمعجون واللبنان والمراية ومشط يمكن أحتاجه، رغم أنى محجبة».