اليوم.. يوسف بطرس غالى على «DMC» فى أول ظهور له منذ «25 يناير»
الإعلامى أسامة كمال
قال د. يوسف بطرس غالى، وزير المالية الأسبق، فى أول ظهور إعلامى له بعد «25 يناير»، إن المشكلات الاقتصادية الموجودة حالياً حجمها مضاعف عن المشكلات التى كانت تعانى منها البلاد وقت بدء مشروع الإصلاح الاقتصادى فى 2004 و2005.
وأضاف، فى حواره مع الإعلامى أسامة كمال فى برنامج «مساء DMC»: «فى 2004 كان عندنا مشاكل لكن متناثرة، وفى نفس الوقت عجز الموازنة لم يكن كبيراً، وكان عندنا أزمة فى سوق الصرف وسعر الصرف لكن ليس مثل الآن، وكان عندنا تضخم لكن كان فى حدود 6 و7 و8%، وكان الاقتصاد العالمى أكثر مساندة، النهارده الاقتصاد العالمى تعبان.. كان عندنا ظروف أقل حدة من الظروف الحالية، زى واحد كان عنده انسداد فى الشرايين، انسداد فى شريان أو اتنين والباقى شغال، لكن النهارده الشرايين الأربعة كلها مسدودة ولا تعمل، وكذا جهاز فى الجسم مش شغال، الكلية والمعدة إلى آخره.. النهارده بنحاول نحل مشاكل وفيه حاجات كتير ضربت فى نفس الوقت».
وقال «غالى» خلال الحوار الذى يُبث مساء اليوم، الأربعاء، على قناة DMC إن «قرار التعويم صائب 100% لكنه جاء متأخراً.. لو تم اتخاذه من 3 سنين ماكانش هيبقى عندنا مشاكل ومعاناة النهارده، والطبقة الفقيرة ومحدودة الدخل لم تكن لتعانى معاناة شديدة كما يحدث اليوم.. للأسف جرس الإنذار كان رن من 3 سنين، كنا ابتدينا ناخد إجراءات عشان نطفى الجرس.. قعدنا مسكّتين الجرس لأشهر».