الشتا..
واللي باقي من جروحنا
بعد موت أشياء في روحنا
بعد كل شوية مطر
انسحابنا للي كان
واشتياقنا لكل حاجة حلوة كانت
واختفائنا في كل ليل بعد ما أوجاعنا بانت
كل دي عادات تبين قد إيه مخدوعين
وإننا بفعل الروتين انتهينا
وإن الشتا من غيرنا زي اليتيم
واليتيم إن بكى فذنبه فينا
العياط..
هو أحسن دليل إن
لسه فينا حاجة حلوة
لسه حابسين جوه منّا
الماضي وذكرياته
لسه فاكرين اللي ماتوا
لسه بنحب اللي فاتوا
وموتونا بالغياب
كلنا فاللعبة ديه
محبوسين في طريق عذاب
نمشي.. نمشي.
ما بنقوفش غير لو إحنا مقتولين
العياط هو دليلنا
إننا كنا ومازالنا طيبين
الليل..
ملكوت لوحده
اتوجد في الكون كدنيا
واتخلق فينا إحنا دنيا
مليانة مشاهد وناس
مليانة أركان كتيرة
فيها من أحزانا سيرة
فيها من ريحة آهاتنا
واختراقنا للأنين
حبة رتوش وبراهين
اتعالجنا من المخاوف
أو لازلنا خوّافين
بوحنا باللي فينا كله
أو سكتنا
شوفنا في المرايات دموعنا
أو شافتنا
كل ذلك مش هيمنع
إننا في الأصل عايشين مكتومين
إنت..
غامض وانطوائي
مكتئب دايما غريب
عاطفي بإفراط مُريب
عيل جدا حتى وإنت
عديت العشرين سنة
(كل اللي في الصور دول مش أنا)
بس لو ركزت يعني يشبهوك
كلهم غيرك عشان كده فاتوا وسابوك
جايز الأوقات تحبك
جايز الأشياء تتبت
بس همّ لو عليهم هيسبوك
مش عشان عيبة في شخصك
أو غلط قد اتغلط ومتأسفتش عليه
بس كونك انطوائي
ده اللي غير مألوف عليه
لسه فاكر كل واحد عاش في قلبك
أو دخل حبة وطلع
واللي كان وجود مؤقت
واللي كان عِشره وبيت
لسه فاكر كل حاجه وكل واحد
وإنت بس اللي اتنسيت
كل تفاصيلك غريبة
وشك اللي كرمش من كُتر الأنين
عينك اللي دابت من كُتر العياط
قلبك اللي عانى من كونه احتياط
المراية صعب جدا تكشف المتداري فيك
بس تقدر مـ اللي ظاهر ترسم كل حتة
يكون في علمك
اللي كان معاهم في الصور ده يبقى إنت
هي..
أول وآخر بنات حوا في عنيك
خُدها نصيحة
اللي تكشف ليها قلبك
فتعشمك أو توهمك
ثم تبيعك للهزار وتشتريك
اقتلها فيك
قبل ما تموت إنت فيها
خوفا لا تبقى في يوم مـ المركونين
أيوه عارف إنها أول حنين
وإنها أول "بحبِـك" قلتها
بس لسه في اللي أحسن منّها
واللي راح تلقى منك حاجات كتير تشبه لها
واللي راح تبقى إنت فيها
أصدق "بحبَـك" عندها
الحياة..
مش حب زايف مصطنع
ولا عشق إنت مقتنع
إنه الأخير المناسب بالنسبة ليك
دايما هتلقى ناس كتير بتحب فيك
وإنت هتلقى ناس كتيرة تحبهم
الفكرة مين هيكمّل بمين؟
ومين راح يجرح في مين؟
ومين اللي هيفضل يعاني م اللي حبهم؟
الحياة..
ناس اختاروك وحلفوا بالعهد يصونوك
وناس خانوك وعشّموك ثم سابوك
رغم إنك مـ البداية اخترتهم