«سواقة البنات».. أولها معاناة وآخرها سخرية: الناس بترخّم علينا

07:17 م | الاثنين 17 يوليو 2017

اتهامات عدة تواجه الفتيات أثناء القيادة: «العربية دى أكيد فيها واحدة ست»، «البنات مبيعرفوش يركنوا»، «يخرب بيت اللى ركّبكم عربيات»، «دى هتقعد ساعة تركن»، وغيرها من العبارات التى تضايق الفتيات وتؤدى إلى تعرضهن لضغوط أثناء القيادة. أسماء محمد سعيد، تتعرض لمضايقات كثيرة فى الشارع تصل إلى حد «الرخامة»، وأغلب المواقف التى تتعرض لها من سائقى الميكروباص وبعض الشباب الذين وصفتهم بالـ«معقّدين»، لكنها تحرص بشدة على تفادى هذه المضايقات حتى لا تهتز ثقتها بنفسها: «مش كل البنات مابتعرفش تسوق، أنا واحدة وبسوق كويس بشهادة صحابى». تؤكد «أسماء» أن ركن السيارة يتطلب جرأة وقدرة على الاعتماد على النفس: «أنا بعرف أركن، لكن فيه بنات طبعاً أساتذة فى الركن فوق الرصيف». معاناة المرأة أثناء القيادة أضعاف معاناة الرجل، بحسب نهى فتحى التى تؤكد أن قيادة الفتيات ليست سيئة بهذه الدرجة ومن المفروض أن يتم تشجيعهن وليس إحباطهن: «أنا بسوق فى الزحمة وبطلع الدائرى، وبعرف أركن العربية كويس، كل ده وبتعرض لمضايقات، مرة واحد قفل لى مراية عربيتى وطلع يجرى».

يضحك شريف محمد، سائق تاكسى، وهو يروى مواقفه مع الفتيات اللاتى يقدن ويقابلهن على الطريق: «الست بطبيعتها بتخاف من أى رد فعل، ومابتعرفش تتصرف فى المواقف اللى محتاجة قلب جامد وجرأة وفى نفس الوقت حسن تصرف». يسخر «شريف» من الفتيات أثناء ركن السيارة: «ده ممكن تقف جنبها نص ساعة على ما تركن، وبرضه بتخبط عربيتها». مواقف عدة تعرض لها خلال مشاويره، زادت من قناعاته بأن المرأة ليست كالرجل على الطريق: «مرة كنت ماشى فى صلاح سالم، واحدة خبطت لى العربية، ونازلة تقول لى مش تحاسب»، وموقف آخر لسيدة كانت سبباً فى حادث تصادم 7 سيارات، بعد فرملتها فجأة بسبب وجود قطة أمامها.