محمد جلال محمد جلال مسير الحي يتلاقى
الإثنين 14-08-2017 | PM 04:53

محمد جلال.. شاعر ومؤلف وكاتب مصري، صدر له ديوان شعر بعنوان "إثبات حالة"، وشارك في العديد من المعارض المحلية والدولية والندوات الثقافية، كما أنه كاتب مقالات في صحف عربية وأجنبية، وباحث في شؤون السلام وحقوق الإنسان.

قالوها زمان

مسير الحي يتلاقى

وما دمت أنا حي

مسيرنا في يوم هنتلاقى

واتكلم وتتكلم

ونتكلم

وهاحكي لك

إزاي في البعد بتألم

طب فاكر لما كنت بتسلم؟

وأول مرة أشوفك فين؟

وآخر ضحكة ع الخدين؟

حاجاتك لسه في مكانها

بقالها سنين

ماخدش العمر منك حاجة

ولا ادالك

ولا سابني كده في حالي

ولا سابك

وطال الوقت في غيابك

وقفت كتير على بابك

وكنت استنى بالساعتين

سألت عليك في كل مكان

قالوا

من فترة كبيرة مش بيبان

مش فاكر قاعدتنا زمان؟

لساك بتروح

ولا نسيت العنوان

على فكرة

أنا مسافر كمان يومين

ماتسألنيش هروح على فين

ده لو فاتوا حتى سنين

مسير الحي يتلاقى

ومسيرنا في يوم هنتلاقى

تعليقات الفيس بوك

القصائد الأكثر مشاهدة

عاجل