طبيب يرد الجميل لأهالى الصعيد بـ6 عمليات مجاناً كل أسبوع

08:39 م | الجمعة 08 سبتمبر 2017

شعوره بالمسئولية تجاه المرضى، جعله يُخصص جزءاً من وقته لإجراء 6 عمليات مجانية كل أسبوع، وبدأ الطبيب عبدالرازق حسن، استشارى جراحة الكلى والمسالك البولية، فى علاج المرضى مجاناً منذ 6 أشهر لعلاج مرضى المسالك البولية بالصعيد، خصوصاً بمحافظة قنا: «الدنيا بقت غالية جداً، والغلابة كتير، ولازم كلنا نقف جنب بعض».

قرّر أن يُخفّف عن المرضى آلامهم المادية والجسدية معاً: «العملية لو بتتكلف عشر آلاف جنيه، فالمريض مش بيدفع غير 500 جنيه تكلفة الشاش والقطن والحقن بس». ومنذ أن بدأ «عبدالرازق» فى حملة إجراء العمليات مجاناً، وتعاون معه أكثر من طبيب بمجالات طبية مختلفة: «فيه حالات من غير القادرين، بتيجى تكشف عندى مسالك، لكنهم بيكتشفوا أنهم مرضى عندهم أعراض أخرى مختلفة، فى الحالة دى باحولهم لدكاترة تانين بيتنازلوا عن أجرهم برضه».

المبادرة التى قام بها «عبدالرازق» تخدم أهالى محافظات قنا والبحر الأحمر والأقصر وأسوان: «الصعيد مليان غير قادرين كتير محتاجين نظرة فى نواحى مختلفة، ودى أقل خدمة نقدمها ليهم.. ده رد جميل لأهل بلدى»، أما أكثر العمليات التى تتردّد عليه فى الفترة الأخيرة فهى تفتيت الحصوات: «الجلسة بتاخد ساعة إلا ربع، ومابادفعش المريض أكتر من 150 جنيه، تكلفة المحلول والحقن»، أما الوقت الذى يستغرقه لعمل العملية الواحدة فيتراوح بين 3 و4 ساعات: «أهم حاجة المريض قبل ما ييجى يكون مجهز معاه كل التقارير اللازمة، واحنا بنعمل كشف تانى مجانى، علشان نتأكد أكتر من صحة التحاليل والتقارير، ونبدأ فى التجهيز للعملية».