اللبس الشتوى بالكيلو: كل ما توزن أكتر.. تدفع أقل

10:02 م | الأحد 08 أكتوبر 2017

بالتزامن مع بداية الموسم الشتوى، ومع اتجاه الكثير من الأسر للتوفير، رفعت الكثير من المحلات التجارية بمختلف المحافظات شعار «نعم للتوفير والبيع بالكيلو بدلاً من القطعة»، حيث دفعهم عزوف الزبائن عن الشراء إلى تشجيع الطريقة التى ترضى الزبون وتجذبه للشراء وتحقق قدراً من المكسب: «بنجيب اللبس مستورد بالكيلو وبنبيعه بردو بالكيلو.. أهو كله لخدمة الزبون». {left_qoute_1}

لم يجد أحمد طه من المنوفية، 40 سنة، وسيلة لتحقيق الأرباح سوى بالترويج لبضاعته بطريقة جديدة: «بقالى سنه بالظبط شغال على البيع بالكيلو.. بره الناس متعودة إنها تشترى بالطريقة دى لكن هنا الموضوع جديد على الزبائن»، 220 جنيهاً هو سعر الكيلو الذى حدده «طه» للبيع لهذا العام: «الجاكيت بيبدأ من نصف كيلو وحتى 2 كيلو ونصف.. أغلى جاكيت بيوصل لـ600 جنيه»، يجد «طه» أن الفارق الكبير فى الأسعار بينه وبين المحلات العادية هو ما سيجعل عليه الإقبال خلال الموسم كبيراً: «وزن الجاكيت بيختلف حسب اختلاف خامته الفايبر بيكون أخف نوع وأتقل حاجة بتكون الجوخ والصوف والجلد».

«لُقطة»، «أحلى فرصة».. شعارات مختلفة رفعها خالد درويش على صفحته على موقع التواصل الاجتماعى «فيس بوك» لجذب الزبائن لطريقة بيعه المختلفة، حيث إن عمله بالمجال لأكثر من 10 سنوات أكسبه خبرة فيما يرضى الزبائن: «بشتغل من فترة كبيرة فى بيع تصفيات المصانع والتوكيلات.. زبون الشتا مش بيهمه إنه يشترى على الموضة بيهمه أكتر إنه يشترى خامة نضيفة»، حيث يصف «درويش» هذه الطريقة فى البيع بأنها مربحة: «حددت تمن بيع الكيلو السنه دى بـ150 جنيه»، ويعد الميزان الحساس أهم قطعة يعتمد عليها «درويش» فى عمله: «دايماً براعى إن الميزان بتاعى يكون دقيق عشان أمنع أن يكون فيه أى شبهة غش».

«جاكيت، سيويت شيرت، بلوفر».. تشكيلات مختلفة من الملابس الشتوية يبيعها «درويش» لزبائنه بمحافظة قنا: «أنا كل شغلى بيكون تصفيات مصانع ألمانى وبلجيكى وصينى وفرنسى.. بيكون بواقى الموسم اللى فات».

وعن تجربة الشراء بالكيلو، تروى «أسماء خالد» أنها اقتصادية وموفرة بشكل كبير بشرط انتقاء القطع المختارة للشراء بعناية كبيرة: «لازم تتأكد إن اللبس مفيهوش أى عيوب واضحة وتخلى بالك من الميزان لأنه كتير مش بيكون مضبوط»، وبحسب «أسماء» فإن سعر الكيلو كان يتراوح العام الماضى بين 140 و200 جنيه: «السنة اللى فاتت اشتريت جواكت لأولادى ومدفعتش أكتر من 300 جنيه».