«ليه تشترى فستان لما ممكن تلبس تيشيرت؟»: «افرح بـ50 جنيه»

08:28 م | الجمعة 02 مارس 2018

بدلاً من ارتداء فستان باهظ الثمن، اختاروا الفرحة بطريقة خارج الصندوق، بارتداء «تيشيرتات» مبتكرة توفر مبالغ مالية يمكن استغلالها فى باقى تجهيزات الزواج. غلاء أسعار ملابس الزفاف وليلة الحنة جعل مصطفى أبويوسف، 28 سنة، يفكر فى بيع «تيشيرتات» مختلفة، مطبوع عليها عبارات متعددة مثل «أنا العروسة»، «أخت العريس»، «الفرح ده يخصنا»، ما استهوى كثيراً من المرتبطين، فأقبلوا على شرائها.

يعمل «مصطفى» فى بيع الساعات التقليد «هاى كوبى» منذ 4 سنوات، لكنه أُعجب بفكرة بيع «تيشيرتات» المناسبات المطبوعة، يقف فى محله طيلة ساعات النهار يبتكر رسوماً مختلفة تبهر الزبائن: «الشباب دلوقتى بقت أفكاره غير تقليدية، عاوزين يحتفلوا بشكل جديد، وده شجعنى أتجه لمجال طباعة تيشيرتات المناسبات، خصوصاً إن بيع الساعات بقى مش جايب همه». تتراوح أسعار الـ«تيشيرتات» المطبوعة بين 55 و60 جنيهاً، وفقاً للخامة المستخدمة: «فيه تيشيرتات جاهزة أسعارها 50 جنيه، وفيه واحد بيطلب بخامة معينة أغلى»، مشيراً إلى أن «تيشيرت» ليلة الحنة يُقبل عليه مئات الفتيات لتوفير نفقات شراء فستان سهرة: «دلوقتى البنات عشان تلبس فستان فى ليلة الحنة هتتكلف مبلغ وقدره، حتى لو كان الفستان إيجار، عشان كده فكروا بطريقة عملية وفى نفس الوقت جذابة، واشتروا تيشيرت، وبكده تجهيزات الليلة كلها مش هتعدى الـ500 جنيه».