عزيزى الضحك من غير سبب
تحية طيبة وبعد:
علاقتنا بالضحك.. علاقة كدة تلاقيها "عجيبة مُريبة"، دايما مبنيه على سوء الظن، على عكس العلاقه اللى المفروض تجمعنا ببعض،علاقة عامله كدا زى راجل ومراته بيحبوا بعض بس على طول بيتخانقوا، مش قادرين يفهموا بعض ولاعارفين يوصلوا للحاجة الحلوة اللى بينهم.
بصراحه الغلط كان من عندنا إحنا، معرفناش نتعامل مع هذا الكائن اللذيذ البسيط اللى عمره ما اتأخر علينا لما بنحتاج له ولا بيطلب مننا فلوس مقابل وجوده بينا، ولا قال لك فى مرة معلش هتأخر عليك شوية، أو مش هجيلك النهاردة علشان عندى ظروف، يعنى على بلاطة كده عمره ما اتحجج علشان ميبقاش موجود.
يا ريتنا بقى سكتنا له أو سبناه فى حاله بعد ما قررنا قطع العلاقات بينا وبينه، لأ.. ده إحنا عملنا خطة شريرة "سوءنا" بيها سمعته، زى ما نكون كده بنلاقى لنفسنا مبرر يأكد لنا عدم سلامة نيته، وإنه شىء مضر بالصحة والأخلاق، واتهمناه بأبشع الاتهامات.. قال إيه.. الضحك من غير سبب قلة أدب.
ده اسمه كلام! يعنى إيه الضحك من غير سبب قلة أدب، هو إحنا ليه بنكبر المواضيع كده وبنديها أكبر من حجمها ونوصلها لحد الإهانة، مبدئيا كده مفيش إنسان عاقل مُتزن بيضحك من غير سبب، أكيد الشخص اللى ضحك ده افتكر موقف معين أو حصل قدامه موقف أثار حاسة الضحك عنده علشان كده ضحك.
حتى لو ضحك من غير سبب، إيه المشكلة ما يمكن فى بينه وبين الضحك اللى إنت مقاطعه ومطلع عليه إشاعات حبة عمار يا أخى، ما تسيبوا الناس تضحك بسبب أو من غير سبب، كفاية الهموم اللى الضحك شايلها عنكم.
نيجى بق للاتهام الثانى واللى فى كارثة أعمق حبتين:
خير اللهم اجعله خير إحنا مبطلناش ضحك من الصبح، أكيد هتحصل مصيبة، أنا مبتفائلش بالضحك ده أبدا، دى بقى إحدى روائع الاتهامات المقدمة ضد كائن الضحك البسيط، أمال إيه الحاجة اللى بتخلى حضرتك تتفاءل طالما الضحك بذات نفسه بيقلب معاك بمصيبة.
مقدرتش بصراحة ألاقى حاجة بتربط بين الضحك والمصيبة غير إننا مُعقدين وما بنحبش نسيب الحاجة على حالتها، لازم نزود عليها زيادتنا الكئيبة اللى تسد النفس.
الاتهام الثالث وهو الأعمق والأهم:
هموت من الضحك، مع إن فى مقولة تانية من موروثاتنا الحكيمة برضه بتقول "الضحك بيطول العمر"، يبقى إزاى هتموت من الضحك، والعلم والحكمة أكدوا لك إنه بيطول العمر، كفايه بقى افتراءات ملهاش لزوم، الضحك بسبب أو من غير سبب ضرورة علشان الحياة متاعبها تخف وتمشى، الضحك بسبب أو من غير سبب علاج ودواء، الضحك بسبب ومن غير سبب أداة بنهون بيها على بعض، الضحك بسبب ومن غير سبب بيغير شكل الحياة كلها للأحسن لو اعتمدنا عليه.
يا ريت نسيب كل حاجة على حالتها، يا ريت منحاولش نتهم الضحك دايما ونمنعه بمعتقادتنا الغلط اللى بتخسرنا كتير وبتضيع من وقتنا وعمرنا حاجات حلوة، ما بنستمتعش بيها بسبب الخوف،الضحكة صعبة، صعب إنك تلاقيها، صعب إنك تشتريها، فلو جتلك الضحكة اضحكها على طول من غير سبب ومن غير خوف، واضحك لحد ما تموت.
إمضاء/
ضحكة بتحاول تدافع عن نفسها فى مجتمع ظلمها كتير.