الموضة وأحكامها: فساتين من المسامير و«سلك المواعين»
الموضة وأحكامها: فساتين من المسامير و«سلك المواعين»
أرادت أن تخرج عن المألوف بعمل ماركة تجارية خاصة بها، فصممت فساتين من الأدوات الحادة كالمسامير و«سلك المواعين»، لتجذب عيون مصممى الأزياء لهذه الطريقة المبتكرة. أمل الصاوى، 30 سنة، حاولت العمل فى المجال الذى تهواه وتبدع فيه وتقضى به معظم أوقات فراغها: «الموضوع بدأ معايا إنى كنت بحب أرسم فساتين جداً وأتسلى بيهم ولقيت اللى حواليا بيشيدوا بالرسومات بتاعتى».
بعد الإعجاب الشديد من جانب صديقاتها برسوماتها قررت احتراف المجال والبدء فى تعلم عمل المانيكان: «الموضوع اتطور واحدة واحدة بقيت باتقن رسم المانيكان وأظبط المقاسات». يعد استخدام أسلاك المواعين من أغرب الخامات التى استخدمتها فى تصميماتها: «الألوان مش بتبهرنى فى استخدامها قد ما بيبهرنى إنى أستخدم أدوات غريبة».
حاولت «أمل» التواصل مع بعض مصممى الأزياء المشهورين أملاً فى الحصول منهم على دعم وتشجيع لتصميماتها: «فيه ناس شجعتنى، لكن محدش خلانى أشتغل معاه أو أساعده، المجال ده كل شخص فيه بيحب يبان محدش بيساعد حد»، تحاول أن تطور من إمكانياتها فى المجال عن طريق بعض الفيديوهات على موقع «يوتيوب»: «باتعلم التفصيل والخياطة بشكل احترافى، نفسى يكون ليا براند خاصة بيا»، 10 دقايق هى المدة التى تأخذها فى التفكير فى شكل التصميم: «نفسى أعمل فستان للفنانة يسرا من الخامات الغريبة دى لأن بشوف جسمها بيبرز التصميمات وبيبينها بشكل كبير»، وعلى الرغم من غرابة أفكارها فى مجال الأزياء فإن زوجها يدعم أفكارها بشكل كبير: «جوزى بيشجعنى جداً، وهو اللى مخلينى أكمل».
