العيد خلص والخصومات مستمرة: خطة لتنشيط «الحال الواقف»
قرية سياحية تمد خصومات العيد لتنشيط حركة الإشغالات
رغم انتهاء عيد الأضحى، فإن عروض التخفيضات التى قدمتها معظم محلات الملابس والأحذية، وكذلك المطاعم والمقاهى وشركات السياحة الداخلية، لا تزال مستمرة، وذلك فى محاولة لتنشيط حركة البيع والشراء، التى غالباً ما تشهد حالة من الركود فى الأيام الأولى بعد الأعياد مباشرة، وتراوحت هذه الخصومات بين 10% و50%.
«بناخد أسبوعين كمان بعد العيد بتفضل الخصومات مستمرة، لأن اليومين اللى بعد العيد دول معروفين على طول الدنيا نايمة، فبنحاول نبيع بنفس الخصومات علشان مايحصلش خسائر»، حسب مصطفى عمر، مسئول محل ملابس «أونلاين»، الذى يقدم خصومات تصل إلى 20%، على قطع الملابس الخاصة بالرجال، وبدأت الخصومات قبل 10 أيام من العيد، ومستمرة حتى الآن: «فيه عالم رايقة كده بتحب تنزل تتسوق وتشترى بعد العيد ما يخلص علشان ياخدوا راحتهم فى الفرجة ويلاقوا اللى هما عايزينه بعيد عن زحمة العيد»، لافتاً إلى أن هناك بعض المواطنين الذين يتردّدون فى الشراء يقبلون عليه لمجرد وجود خصومات: «اللى مالحقش قبل العيد يلحق فى آخره، المهم يكون اشترى فى الفترة اللى بتكون فيها خصومات»، وهناك قطع يعرضها المحل للبيع بتخفيض أكبر من التخفيض الخاص بفترة ما قبل العيد: «دى بتبقى خاصة بالقطعة الواحدة المتبقية من الموديلات والتخفيض بيوصل فيها للنص».
عروض تقدمها محال الملابس والساعات والمطاعم والقرى السياحية
خصومات تصل إلى 10% على أحدث ماركات الساعات المحلية والعالمية، هو ما يقدمه محل خاص ببيع الساعات الفضية، بمنطقة وسط البلد، بدأ المحل هذا العرض قبل أيام قليلة من العيد، ولا يزال مستمراً لبعد العيد لتنشيط البيع: «إحنا مستمرين فى التخفيض ده لحد آخر أغسطس، كل حاجة بعد كده هتتغير، علشان بعدها بشهر داخلين على أوكازيون»، كلمات عمر عبدالعال، عامل بالمحل: «إحنا بناكل عيش على الخصومات اللى بيبقى فيها لمة عيد، الناس بتتبسط وتجرى عليها وتقول لك لحقنا حاجة من العيد وغالباً فيه ناس بتستنى بعد العيد علشان تكون المحلات عملت تخفيض أكبر، وده اللى بيحصل فعلاً إننا فى الفترة دى اللى السوق نايم بنشد الزبون بأى حاجة».
تقدم شركة للسياحة الداخلية، خصومات على الرحلات السياحية الأسبوعية إلى مدينة شرم الشيخ والغردقة، يبلغ سعر الفرد بالغرفة المزدوجة 735 بدلاً من 1000 جنيه: «ده أقل سعر فى اليوم فى فندق 5 نجوم، وده من ضمن عروض العيد اللى كانت معانا من أول يوم لحد دلوقتى، علشان فيه ناس بتحب السفر بعد العيد علشان الزحمة»، حسب مصطفى كارم، موظف بالشركة، كما يقدم أحد المطاعم بمنطقة المهندسين خصومات على الحساب فقط، بإلغاء الضريبة والخدمة منذ العيد وحتى الآن.