غياب روح التعاون بين الناس فى الشارع، وقلة مبادرات الخير وتقديم يد العون للآخرين، لفتا انتباه فريق من قسم العلاقات العامة بكلية الإعلام جامعة الأزهر، فقرروا تخصيص مشروع تخرُّجهم حول الخير، رافعين شعار «اسعى فى الخير»، ويدعون من خلال المشروع إلى الحث على فعل الخير ومساعدة الأشخاص لبعضهم بمختلف فئاتهم دون انتظار مقابل. حمادة زيدان، وزملاؤه فى المشروع، قرروا نشر التوعية فى الشوارع، سواء بالحديث مع الناس أو بتوزيع منشورات تحمل أهداف الحملة: «الفترة الأخيرة لاحظنا تغيراً كبيراً فى تصرفات الناس، كله منشغل بمصلحته ومحدش بقى عنده روح التعاون زى زمان، يعنى اللى يلاقى شخص مسن شايل حاجات تقيلة نساعده فيها، ولو لقينا حد محتاج مساعدة فى عبور الطريق أو وقع منه فلوس نحاول نرجّعهاله». بالذهاب إلى إحدى المناطق فى مدينة 6 أكتوبر، بدأ الفريق تنفيذ فكرة الحملة على أرض الواقع، بمساعدة بعض الأشخاص، وصوروا إعلاناً يعبّر عن فكرتهم: «حبينا ننزل ننفذ فكرتنا فى إطار الإمكانيات المتاحة لنا، اتكلمنا مع الناس وساعدنا البعض على قد ما نقدر».
يستهدف الفريق المكون من 8 أفراد، والذى يركز حملته على فئة الشباب من الفئة العمرية بين 15 و45 عاماً، والذين تقع عليهم مسئولية تلبية المساعدة، سواء للأشخاص المسنين أو ذوى الاحتياجات الخاصة أو الأطفال: «لازم كلنا نساعد بعض عشان إحنا عايشين فى مجتمع واحد، ونفسنا الحملة تستمر بتبنّى إحدى الوسائل الإعلامية لها بعد إتمام المشروع، لأنه هيبقى صعب علينا نشتغل لوحدنا.. محتاجين دعم إعلامى».
تعليقات الفيسبوك