«تيشيرت» محمد صلاح يغزو سوق الموضة.. Never give up

10:01 م | الخميس 09 مايو 2019

«تيشيرت» أسود، مكتوب عليه Never give up، أو «لا تيأس أبداً»، ظهر به نجم المنتخب الوطنى محمد صلاح، فى المباراة الأخيرة لنادى ليفربول الإنجليزى، التى لم يشارك فيها لإصابته، تحول إلى «تريند»، وبينما انشغل المغردون على «تويتر» بتفسير الرسالة التى قصد «صلاح» توصيلها، كان بعض تجار الملابس والمطابع يتعاقدون على طرح التيشيرت باللونين الأسود والأبيض، متوقعين إقبال الشباب عليه.

«لمّا الناس عرفت إنى بأطبع تيشيرت صلاح، استقبلت طلبات كتير، التيشيرت والجملة المكتوبة عليه قلبت الدنيا»، يقولها أحمد تهامى، متخصص فى الطباعة على التيشيرتات، بمنطقة الشرقية.

يبيع «تهامى» التيشيرت الواحد بـ120 جنيهاً، والقطعتين بـ200 جنيه بدلاً من 240، مؤكداً أن خامته قطن ومقاساته حتى 3XL. بسعر أقل لا يتجاوز 100 جنيه، عرض أبوبكر السيد، تيشيرت «صلاح»، وقام بتسويقه على صفحات السوشيال ميديا، ليفاجأ بردود فعل الشباب: «جالى طلبات كتير مش ملاحق عليها، الناس كلها بتحب محمد صلاح وبيقلدوه فى كل حاجة».

أسعاره تتراوح بين 100 و130 جنيهاً.. والتجار: مش ملاحقين

اعتاد «أبوبكر» على شراء «تيشيرتات» سادة من المصانع، ثم يطبعها بجمل وصور مختلفة ترضى أذواق الشباب: «دايماً بنشوف الشخصيات المؤثرة زى صلاح، وميسى ورونالدو، لابسين أو عاملين إيه ونشتغل عليه، لأن الناس بتقلدهم، حتى صلاح لما كان معاه كتاب فن اللامبالاة، الكتاب باع واتنشر بعدها». ستوديو تصوير وطباعة بمحافظة كفر الشيخ، أعلن عن توافر تيشيرت «Never give up»، بمقاسات مختلفة وخامة قطن باللونين الأبيض والأسود، وبحسب جوزيف إدوارد، صاحب الاستوديو، فإن الأمر لا يعدو أكثر من كونه تجارة: «إحنا بنشوف الزبون عايز إيه، وصلاح لما بيلبس حاجة مميزة بتقلب الدنيا وبتبقى موضة، وإحنا شغالين على فكرة التريند، بنتابع عشان نشوف احتياجات السوق».