أصحاب الفكرة وبعض الموهوبين داخل المكان
مجموعة من الموهوبين فى الشعر والغناء والتلحين والإنشاد، كانوا على موعد للالتقاء فى محل بن فى منطقة الطالبية بالهرم، لإقامة أمسية ثقافية تغلفها روائح القهوة الزكية، حيث أصبح المحل ملتقى يجمع المثقفين من أبناء المنطقة ويكون فرصة لاكتشاف المواهب الجديدة.
مدحت عبده، صاحب الفكرة، وجد أن المحل القديم المشهور ببيع البن هو الأنسب لأمسيتهم، حيث تبعد مقاهى وسط البلد والحسين عن الهرم، فقرروا أن يخلقوا لأنفسهم مكاناً خاصاً بهم لاكتشاف مواهب الشباب فى المنطقة، وحسب قوله: «أجّرنا المحل وجِبنا فراشة وبنعمل أمسية كل يوم جمعة، الأسبوع اللى فات كان موعد أول أمسية وكان الإقبال كبير من جانب الجيران بصورة غير متوقعة، كل اللى معدى ويسمع الأصوات يقف يتفرج ويقعد، لدرجة إن صاحب توك توك بيعرف يغنى، لما عرف إن فيه صالون راح استحمى وجه عشان يعرض موهبته ويغنى».
5 ساعات عاشها أهالى منطقة الطالبية بين أبيات الشعر وأوتار العود ونغمات الموسيقى: «إحنا كنا 35 شخص وكان بيننا ستات مش رجالة بس، قلنا شعر، وإنشاد، وغناء، وعزفنا عود، وناقشنا قضايا اجتماعية بتهمنا زى قضية الطلاق».
وحسب «مدحت» فإن الأمسية ضمت 8 شعراء ومنشدين وملحنين من أبناء المنطقة: «فى الفترة الجاية هيتم التركيز على اكتشاف المواهب من الأطفال، مش بس فكرة تبادل الثقافة والخبرة».
تعليقات الفيسبوك