معاناة شديدة كانت تعيشها نجوان خفاجى، وغيرها من قصار القامة، عند شراء ملابس جديدة، لصعوبة إيجاد مقاسات تناسبهم، فكانت تضطر إلى إعادة تفصيل ما تقوم بشرائه من ملابس لتتمكن من ارتدائها.
الالتحاق بكلية الاقتصاد المنزلى، قسم ملابس، جامعة حلوان، قرار اتخذته «نجوان» لحل مشكلتها، وفور تخرجها عملت فى التفصيل داخل عدد من الأتيليهات، وأصبحت تفصّل جميع ملابسها الشخصية بتصميمات مختلفة، بعد أعوام من عناء الشراء.
«كنت بدوّر فى ملابس الأطفال بس ماكنتش بلاقى مقاسات تناسب جسمى وتطوراته، ماكانش عندى رفاهية الاختيار بين الموديلات، اللى بلاقيه باخده»، تقولها «نجوان»، التى تتمنى الوصول إلى جميع قصار القامة رجالاً وسيدات بمختلف المحافظات، وتوفير ملابس بمقاسات مناسبة لهم.
أدوات بسيطة وصغيرة تناسب حجم جسدها، تعتمد عليها صاحبة الـ40 عاماً فى عملها داخل ورشتها لتصميم وتفصيل الملابس لقصار القامة وغيرهم على حد سواء، بداية من القميص والبنطلون، وحتى الحذاء والحقائب. لظروف شخصية توقفت «نجوان» عن العمل، ثم عادت لاستكمال حلمها ومساعدة قصار القامة: «عندنا مشكلة إن الظاهر منا فى المجتمع عدد قليل، لكن فيه ناس كتيرة موجودين ومحدش يعرف عنهم حاجة، وبيتكسفوا يظهروا عشان تعليقات السخرية اللى بيسمعوها فى الشارع».
افتتاح خط إنتاج ملابس خاص بقصار القامة، أمنية تسعى إلى تحقيقها «نجوان»، ابنة محافظة القليوبية، وعمل عرض أزياء خاص بهم، لعرض تصميماتها أسوة بما يجرى فى عدد من البلاد الخارجية: «إحنا بنعانى كتير، بسبب إن شكل جسمنا مختلف أو مدكوك زى ما بيقولوا، رجلنا صغيرة بس عريضة، بنحتاج حد يكون فاهم طبيعة جسمنا وده منعدم للغاية، عشان كده برتب أكون أنا الشخص ده».
تعليقات الفيسبوك