بريد الوطن| عروة مقطوعة
الورد
إزاى تكون للوردة دار
إزاى تصون حتى الزرار
وهو متعلق بفتلة
وبطرف خيط
قال المثل
ضل الوطن ولا ضل حيط
حلم الجدع فعلاً بسيط
بس الوطن هو المحال
قصقص ف أحلام العيال
حلم الجعان مبقاش بسوق
بقى حلمه إنه ف يوم يدوق
طعم الشبع
من حاجة غير ريقه اللى سال
حلم العيال.. مبقاش بلعبة
حلم اللى صلى مش بس كعبة
حلم البنات مبقاش بفارس م الخيال..
بقى حلمنا إزاى نعيش..
إزاى نغير ف اللغة كلمة مفيش
إزاى نوفر للشتا.. تمن الجاكتة
وللوليد علبة لبن
وحق «بامبرز» أو بفتّة
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com