صاحب "بوجي وطمطم": وسّعت مجال شغلي بقرض "تنمية المشروعات"
عصام صالح يعرض منتجاته
وسط مجموعة كبيرة من لعب الأطفال، جلس عصام صالح، 44 سنة، من مدينة طنطا بمحافظة الغربية، ينظف معروضاته كى تبدو براقة، ويطمئن على جاهزيتها ليوم الافتتاح، من بينها دميات لـ«بوجى وطمطم وخروف وجمل»، وجميعها منتجات مصنوعة من القماش المصرى، حيث يرفض التعامل مع الأقمشة المستوردة، معتبراً أن الأهم فى تلك المرحلة هو تشجيع الخامات المحلية، وإن كانت أقل جودة، فربما يأتى يوم لتصبح الخامات المحلية ذات جودة أفضل من المستوردة، وهذا بدوره سينعكس على المجتمع بالإيجاب، مطالباً الأهل بالاعتماد على الألعاب المصنعة من الأقمشة لقلة ضررها على صحة الطفل، يقول: «القماش مصرى عشان على الأقل ببقى عارف مصنوع إزاى وعبارة عن إيه، لكن المستورد محدش يعرف حاجة عن ظروف تصنيعه».
"عصام": "هدفى توصيل رسالة مهمة للشباب وهى إن الشغل والنجاح مش هييجى بسهولة.. لازم سعى وتعب"
يقول «صالح» إنه يعمل فى صناعة ألعاب الأطفال منذ ما يزيد على 20 عاماً، قضاها متنقلاً بين ورش التصنيع حتى أتاحت له الظروف الحصول على قرض من جهاز تنمية المشروعات المتوسطة والصغيرة ومتناهية الصغر، فكان لعام 2011 ذكرى طيبة يرويها للأبناء، فالأحلام تتحقق عندما تصمد الدوافع أمام التحديات، يحكى: «أخدت القرض وبدأت أشتغل بجد، وأوسع مجال شغلى، وأستغل المناسبات وأعمل شغل يناسبها، فى شهر رمضان بعمل بوجى وطمطم، وفى العيد الخروف والجمل، وكل دى منتجات بيفرح الكل بشكلها، لأنها مختلفة عن شغل الصين اللى معظمه مش مناسب لطبيعة المصريين، لكن الناس بتشتريه من باب الاختلاف».
وعن كيفية مشاركته فى المعرض، يروى لـ«الوطن»: «مفيش معرض بيتعمل إلا وأكون أول الحضور، وأنا حابب أوصل رسالة مهمة للشباب، وهى إن الشغل والنجاح مش هييجى بسهولة، لازم سعى وتعب، والجهاز بيبعت دعوة مشاركة وبنعرض شغلنا وندخل فى منافسة مع ناس تانية، والأفضل هو اللى يشارك، وطبعاً الاختيار مش هدفه التقليل من حد، بالعكس ده تشجيع على الاهتمام بالجودة».
وعن رأيه فى المعرض، يؤكد «عصام» أن اختيار أرض المعارض يعد هو الأنسب للشهرة الواسعة التى يتمتع بها المعرض، ما سيمنح المعروضات فرصة أكبر للتسويق، يتابع: «إحنا البلد الوحيدة فى العالم اللى عندها تراث فى كل مجالات الحياة، وكان لازم نعرّف الناس بعض النماذج من تراثنا، والمعرض فكرة تستحق التحية فعلاً، ويضاف لرصيد إنجازات الرئيس عبدالفتاح السيسى».