فيديو.. أدي الحقنة لزميلي.. ممرض الجبهة يروي مواقف طريفة من حرب أكتوبر

12:22 م | الأحد 06 أكتوبر 2019

روى السيد نجم، ممرض وأديب جبهة القتال في حرب أكتوبر، بعض المواقف الطريفة التي وقعت من قِبل بعض الجنود المصريين خلال أيام الحرب.

وقال "نجم"، خلال حواره مع الإعلامي حسام الدين حسين ببرنامج "صباح الورد" عبر قناة ten: "كان في اتنين من الجنود جم وحدة التمريض مع بعض، وبسبب الزحمة والعدد الكبير قولتلهم ناموا أنتوا الاتنين على السرير ده، فمسكت الحقنة وكل ما أجي أديها لواحد يقولي لا إديها لزميلي، قولتلهم يا جماعة إحنا مش هنهزر، فكل واحد كان شايف إن التاني أولى بالحقنة، ودي الروح اللي كانت موجودة بين الجنود".

واستكمل "نجم"، قائلًا: "وجالي واحد كان عنده شبه كسر فعملتله جبيرة وقولت له استنى هنزلك مصر تكمل علاج، فقالي لا أنا عايز أروح لزملاتي، فقولتله أنت مكانك فين، فقالي 10 كيلو بعد القناة، فسألته هتروحلهم إزاي قالي همشيها، وعقبال ما روحت العنبر التاني ورجعت لاقيته خرج فعلا، طلعت أجري وراه لاقيته على الأسفلت فعلا ورايح ع السويس".

وروى عن موقف عظيم لن ينساه بحب قوله: "جالي جندي وهو ماسك حاجة في أيده وحاطتها على بطنه فأنا عاوز أعرف ده إيه، وكل ما أجي أشدهاله بالراحة هو مُصر ميسبهاش، فبعد ما ادتله الحقن التقليدية فقولت له قولي بس إيه اللي في ايدك، فساب إيديه وببص لاقيته ماسك جزء من علم إسرائيلي، عشان كانت سيطرت وحدته على حصن وخد منها جزء من علم إسرائيل، فكان خايف حد ياخده منه".