اماكن الخروجات في مصر باسعار مناسبة
"فطار على النيل بـ40 جنيه، أركب وأتفسح في الأتوبيس النهري بـ10 جنيه، اتغدى في جنينة كبيرة كلها ألعاب للأطفال بـ55 جنيه بس ومن غير تذكرة دخول".. جزء من بوستات تنشرها صفحات مخصصة للخروجات في مصر انتشرت على موقع التواصل الاجتماعي "فيس بوك"، بهدف نشر ومعرفة هذه الأماكن والفسح التي تتميز بأسعارها المنخفضة للكثيرين.
اعتادت سعاد محمد، أن تبحث عن أماكن الفسح والخروجات "اللي على قد الأيد"، وإرسالها لصفحات مختصة للخروجات في مصر لنشرها وإفادة غيرها: "من فترة كبيرة بقيت أحاول كل مكان فسحة حلو وأسعاره بسيطة أصوره وأبعته للصفحات بتاعة الخروجات على الفيس بأسعارها عشان الناس تستفيد، لأن فعلاًَ مصر فيها خروجات حلوة وسعرها معقول مش لازم نروح الأماكن اللي بندفع فيها بالـ500 جنيه عشان ناكل ونلعب ولادنا، في أماكن كتير حلوة زيها بس محتاجه الناس تعرفها".
وأضافت الشابة العشرينية: "زي مكان على النيل في البحر الأعظم كبير وحلو جداً، في لعب للأطفال والغدا فيه مبيعديش الـ50 جنيه وكويس وأكله نضيف، ده غير أن في فسح فيها النيل بتكون أسعارها بتبدأ من 10 و15 جنيه، على نفس صف كافيهات وأماكن لو أي حد دخلها عشان على النيل مش هيدفع أقل من 200 جنيه".
أحمد نبيل، أدمن أحد صفحات الخروجات في مصر على "فيس بوك"، أكد أن نوعية هذه الصفحات هدفها نشر الخروجات والفسح بأسعار بسيطة دون أي مقابل: "إحنا مش بناخد فلوس من أي مكان بنعرفه للناس، لأن هدفنا أن الناس يبقى عندها وعي للأماكن اللي فيها ترفيه ومش مكلفه على الناس".
وأضاف: "لما بدأنا نعمل صفحة الخروجات دي ونستقبل تجارب الناس في أماكن الفسح اللي أسعارها مش مكلفه، اكتشفنا أماكن مكناش نسمع عنها، واكتشفنا بجد أن مصر في أماكن كتير حلوة ومش مكلفة، كان منهم متحف اكتشفناه جوه حديقة الحيوان مكيف وحلو جداً وفي حيوانات مطحنته تحس إنها حقيقية، وسعر التذكرة فيه 10 جنيه بس".
تعليقات الفيسبوك