حضن يجمع المحافظ ومشرف النظافة في كفر الشيخ.. "تشجيع ودعم ومحبة"
مشرف نظافة اثناء لقاء محافظ كفر الشيخ
يستيقظ قبل أذان الفجر يوميا، يرتدي ملابسه ثم يستقل السيارة ويقطع نحو 10 كيلو مترات من قريته التي يقطن بها إلى المدينة، يبدأ يوم العمل بالنسبة له من الخامسة فجراً، يبدأ مهامه بتوزيع عمال النظافة كلاً في منطقته، كما يتولى عملية توزيع معدات النظافة وسيارات كسح المياه للمناطق المختلفة.
وفي ظل موجة الطقس السيئة لم يستطع الحصول على إجازته الأسبوعية، التي تكون يوم الجمعة، فكانت بالنسبة له يوم عمل عصيب، لكنه لم يتوقع أن كل ما مر به من أحداث متعبة طوال اليوم ستمحيه كلمة شكر و"حضن أخوي" من أكبر مسؤول بمحافظة كفر الشيخ.
"كنت واقف فى الشارع مع العمال، وبشتغل بإيدي علشان ظروف البلد الصعبة مع الأمطار، وفجأة لقيت حد بينادي عليا، وبلتفت لقيت حد بيناديني ويقولى كلم الدكتور إسماعيل عبد الحميد طه، محافظ كفر الشيخ، ببص ورايا لقيت المحافظ جاي يسلم عليا وبيحضني ويبوسني، ويقولي إنتم رجالة وأبطال وأنتو الأهم ولولا أنتم مكنش في حاجة هتتعمل، مكنتش مصدق، بس حسيت بحضن أخوي وإن اللي واقف معانا مش محافظ دا انسان"، بهذه الكلمات عبر واصف عبد القادر عدوى، البالغ من العمر 56 عاماً، مشرف عمال النظافة بأحد أحياء مدينة كفر الشيخ، عن سعادته بتواجد المحافظ طوال اليوم معهم فى الشارع وتقديم الشكر لهم.
ويحكي واصف، لـ"الوطن"، كواليس وقوف محافظ الإقليم، في الشارع لتشجيع العمال ومتابعة كسح المياه قائلاً "كمية الأمطار كانت كثيرة جدا فوق استيعاب قدرات محطات الصرف والماكينات، وتواجدنا في الشارع قبل ساعات العمل المعتادة، كلنا كنا واقفين في ضهر البلد، وقولنا إحنا رجالة في الأزمات، رغم نقص الإمكانيات، واللي خدمنا إننا كنا عملنا حملة تطهير وتسليك للبالوعات قبل ايام، رفعنا الطوارئ وكلنا كنا بنشتغل بإدينا، مفيش فرق بين موظف وعامل، لكن اللي فرق وجود المسؤول الأول في المحافظة، رفع معنوياتنا، شجعنا وحفزنا وقال لنا كلام حلو، إدانا دفعة معنوية كبيرة في وقت صعب، فضلنا نكسح المياه لوقت طويل".
يضيف مشرف عمال النظافة، أن "المحافظ كلمنا من القلب، وعلمنا كيف ندير الأزمة، ووجه لنا الشكر على جهودنا، جميعنا شعر بإحساس الاخوة والابوة، انه يقف ويتحاور معنا ويشد من أزرنا، وكان رد فعلنا، إحنا رجالتك وهتلاقينا فى الأوقات الصعبة واقفين شادين حيلنا، وبنراعي ربنا في شغلنا علشان خاطر البلد، والعمال كانوا مبسوطين، لما سلم عليهم واحد واحد، في قلب المياه، نزلنا علشان يقولنا شكرا، وأنا قولتله أنا بقالي 10 سنين مخدتش إجازة وبحب شغلي اللي لأكثر من 27 سنة، فكان مبسوط".
وعن ظروفه يؤكد، أن لديه 5 أبناء أكبرهم طبيب تحاليل، وأصغرهم طفل من ذوي الاحتياجات الخاصة يبلغ من العمر 12 عاماً، "بشتغل في الأرض الزراعية ومبتأخرش عن شغلي علشان أكل ولادي حلال، ونفسي ابني الكبير يتوظف في الحكومة، علشان يكمل المسيرة مع أشقائه".
وكانت محافظة كفر الشيخ، نشرت صوراً لمحافظ الاقليم، وهو يحتضن عدداً من عمال النظافة وسط مياه الأمطار، الأمر الذي نال إعجاب رواد مواقع التواصل الاجتماعي "فيس بوك".