«عفشك من شخصيتك»، فكرة نفذها عدد من مهندسى الديكور وخريجى كلية فنون جميلة، ليستمتع من خلالها المقبلون على الزواج بأفكار جديدة وقطع أثاث مبتكرة وخارج الصندوق تتناسب مع شخصياتهم وتفضيلاتهم الشخصية، رافعين شعار «وداعاً للكلاسيك».
عبدالرحمن أبوالوفا، صاحب الفكرة، يقوم وفريق العمل بعقد جلسات مكثفة مع العروسين فى البداية لمعرفة ميولهما وشخصيتهما، لتنفيذ تصميمات تناسبهما: «الموضوع بالنسبة لكتير من الزباين فى مصر بيكون زى المخاطرة، بيحبوا يخوضوها وبيستمتعوا بالتجربة، وفيه ناس بيخافوا يكونوا مختلفين عن غيرهم».
٢٠% فقط، هى نسبة الإقبال على الأفكار المبتكرة لتصميم الأثاث بين المصريين، وفقاً لـ«أبوالوفا» على مدار 6 سنوات من العمل: «الإقبال ضعيف، وبنتعامل أكتر مع الأجانب، همّا بيفضّلوا الخروج عن المألوف، فبنصمم أثاث ونصدره خارج مصر، وده شىء بيسعدنا إن الفكرة تنتشر». وبحسب «أبوالوفا» فإن أغرب تصميم قام بتنفيذه لعروسين، كان أثاثاً يميل إلى الطراز الفرعونى ومطعّماً بالنقوش الفرعونية: «العريس كان بيشتغل فى مجال الآثار وكان متأثر جداً بالطراز الفرعونى، وقرر إنه يعمل عفش بيته بالشكل الفرعونى، الموضوع كان مرهق جداً لأن كان فيه تفاصيل كتير جداً فى الرسم والنقوش الموجودة مختلفة عن أى قطعة أثاث عادية».
وتختلف أنواع الأخشاب والألوان المستخدمة فى تنفيذ قطع الأثاث حسب التصميمات: «كل حاجة بيكون ليها خامات مختلفة، والتكلفة بتكون أغلى من العفش العادى، لأن العميل بيكون عامل قطعة أثاث فريدة بتعبّر عنه ومش موجودة غير فى بيته هو بس كأنها باسمه».
تعليقات الفيسبوك