صاحب إحدى مكتبات تصوير الأوراق المدرسية
مع اقتراب امتحانات نصف العام الدراسى الأول، قرر صاحب إحدى المكتبات فى منطقة جسر السويس تبنى حملة أطلق عليها «اطبع بالفكة اللى معاك»، لتخفيض أسعار طباعة وتصوير الأوراق المدرسية خاصة بعد ارتفاع أسعار الورق بشكل كبير خلال الفترة الأخيرة.
جلال حفنى، صاحب المكتبة، حاول حل الأزمة عن طريق تخفيض أسعار الطباعة لتصل 20 قرشاً للورقة الواحدة: «بشتغل فى المهنة دى بقالى 7 سنين، بنحاول كل فترة إننا نهون المصاريف على الزبائن، خاصة إن أغلبهم من الطلاب، فيه مكتبات بتوصل الورقة لجنيه و75 قرش وأسعار تعمل رقم كبير فى الملزمة، مش بيكون فى متناول الكثير من الطلاب».
أطلق «جلال» هذه المبادرة منذ 3 أشهر، وحاول أن يتغلب على بُعد المسافة بينه وبين الكليات عن طريق توفير خدمة الدليفرى: «أكثر أوقات الشغل بالنسبة لنا بتكون مع بداية العام الدراسى وقبل الامتحانات، اللى بيصور ورق المراجعات النهائية والملازم والمحاضرات، وبنعتمد فى شغلنا على طلاب ثانوية عامة أكثر من اعتمادنا على طلاب الجامعات، شغلهم أكتر وعشان كده عملنا فكرة تخفيض تسعيرة الورق». وحسب «جلال» فإنه يتعامل مع كليات التربية والعلاج الطبيعى وطب الأسنان والتجارة: «دى أكتر كليات بتعامل معاهم، الكليات العملى والنظرى الاتنين بيكون عندهم ملازم وبيحتاجوا طباعة ورق، الموضوع مبقاش زى زمان معتمد على كليات النظرى فقط».
«بتعامل بسعر الجملة فى البيع القطاعى»، قالها «جلال» بنبرة رضا: «مفيش تجار فى السوق بيطبعوا بالأسعار دى فى حالة الزبائن القطاعى، لكن بحاول إنى أساعد الطلاب على قد ما أقدر، ومفيش حد بيخسر، اللى بيعمل خير ربنا بيرده ليه». مؤكداً أنه يقوم بطباعة الورقة الألوان بـ25 قرشاً: «المكاتب التانية بتطبعها بجنيه وربع، أنا رجعت أسعار زمان تانى وبتعامل بيها، وراضى بالمكسب بتاعى، ربنا بيبارك فى القليل».
تعليقات الفيسبوك