حملة لتعقيم مساجد قرية في دمياط: راااجعين

08:11 م | السبت 06 يونيو 2020

عودة افتتاح المساجد المغلقة، خبر ينتظره الكثير من المتشوقين للصلاة فى بيوت الله، ولحين افتتاحها قامت مجموعة من المتطوعين بقرية الحورانى، بمحافظة دمياط، بتنظيف وتعقيم المساجد، وتوفير كمامات طبية وكحول ووضع علامات لتضمن وجود مسافة متر بين المصلين.

«خبر إن المساجد تفتح ونصلى فيها من تانى ده اللى إحنا مستنيينه بقالنا كتير ونأمل إنه يبقى قريب، وعشان كده حضّرنا نفسنا وجهّزنا المساجد بالشكل اللى يتناسب مع الإجراءات الوقائية»، بحسب عادل خليل، أحد المتطوعين، وتقوم المبادرة بتعقيم مسجدين يومياً، بعد تنظيفهما جيداً: «حتى الكراسى للمسنين أو ذوى الاحتياجات الخاصة بتكون محطوطة على مسافات بعيدة، إحنا عايزين نرجع نصلى فى بيوت ربنا بس من غير ما نضر حد، وإحنا جوه المساجد هنحافظ على وجود مسافة بينا وكله لابس الكمامة عشان نمنع أى فرصة لنقل العدوى»، لافتاً إلى أنهم أيضاً سيهتمون بتهوية المساجد باستمرار.

قامت المبادرة، بحسب «خليل»، على الجهود الذاتية، حيث جمع تبرعات من سكان القرية، لشراء أدوات التنظيف والتعقيم وأيضاً الكمامات، ووضع لافتة أمام أبواب الجوامع، تشمل مجموعة الضوابط التى يجب على المصلين مراعاتها خلال الفترة المقبلة، ومنها «التعقيم الجيد قبل الخروج من المنزل، استخدام الكحول باستمرار، ارتداء الكمامات الطبية طوال فترة وجودهم بالمسجد، وعدم الدخول للمسجد جماعة»، مؤكداً أنه متفائل كثيراً بنسبة الوعى الكبيرة لدى سكان القرية، الذين سيقومون بتطبيق هذه الإجراءات خلال ترددهم على المساجد: «الناس هنا متعاونين وشايفين بعنيهم اللى بيحصل وعدد الإصابات اليومى والوفيات، وده رافع نسبة الوعى عندهم، إحنا متكفيين ببعض عشان نقدر نرجع لحياتنا الطبيعية بسرعة».