منزل مصمم بشعار الأهلي
أثار منزل مصمم على الطراز الأهلاوي جدلا كبيرا على مواقع التواصل الاجتماعي، حول موقعه، حيث ذكر البعض أنه يقع في محافظة سوهاج، بينما أوضح آخرون تواجده في البحيرة، وسط تفاعل كبير من الجماهير الأهلاوية بالشكل الرائع للمنزل، بغض النظر عن حقيقة موقعه.
وحسم نادر سعيد، صاحب المنزل الجدل حول موقع المنزل، خلال حديثه لـ"الوطن"، قائلا: "المنزل يوجد في قرية المجد النموذجية بمركز الرحمانية في محافظة البحيرة"، مضيفا: "أنا أهلاوي منذ الطفولة، وحبي للنادي هو كان سبب تفكيري أني أدهن البيت بالشكل ده".
وبدأت الفكرة تراود نادر منذ حوالي 5 سنوات، بحسب ما ذكره صاحب الـ39 عاما: "والدي كان زملكاوي متعصب، فكان مستحيل أخلي البيت بالشكل ده وقتها، علشان كده نفذت الفكرة بعد وفاته احتراما له، في نهاية العام الماضي".
ولم تخلو فكرته من سخرية الكثيرين في البداية، كما أوضح "نادر": "ناس كتير سخرت مني فكرتي في البداية قالتلي حد يدهن البيت أحمر، أنا عمري ما شوفت اللون ده، حتى مراتي نفسها اعترضت على اللون، لأن ملهاش في كرة القدم، بس لما كانت تنزل تجيب حاجة كانت بتسمع تريقة من ناس كتير".
السخرية لم تستمر طويلا، فسرعان ما تغيرت إلى إشادة بعد النهاية من التصميم النهائي للمنزل، بحسب نادر: "الناس عجبها البيت واللي رايح وجاي كان بياخد معاه سيلفي، وكل الأهلاوية اتبسطوا جدا بشكل البيت".
وأكد نادر أنه لاقى اعتراضا كبير على جملة "الأهلي فوق الجميع" من الزمالكاوية، خاصة أصحابه: "رغم أن اللي الناس متعرفهوش اللي عمل دهان البيت بعلم الأهلي بيشجعوا الزمالك أساسا".
واستطرد نادر حديثه: "أنا مصورتش البيت وفوجئت أنه عمل ضجة على السوشيال ميديا، لأن اللي نشره واحد جه عندنا من بره البلد، وشاف البيت فعجبه وصوره ونزله على السوشيال ميديا وعملت الضجة دي".
وعن شعوره برد فعل جماهير الأهلي على السوشيال ميديا، رد نادر قائلا: "حاسس أني فخور علشان عملت حاجة فرحت جماهير الأهلي، النادي اللي بشجعه وأتابع ماتشاته منذ طفولتي".
تعليقات الفيسبوك