أطفال دار أيتام يرسمون على الكراسي الخشبية
رسوم مميزة ذات ألوان زاهية، رسمها أطفال دار أيتام الهنا، في عين الصيرة بمصر القديمة، على مجموعة من الكراسي الخشبية، رفعت قيمتها وسعرها وعرضوها للبيع بـ 400 جنيه للواحد، رغبة منهم في أن تكون التبرعات المقدمة لهم مستحقة.
"الأطفال هما اللي عرضوا عليا أننا نشتري كراسي ويرسموا عليها الفن التشكيلي اللي بيتعلموه في الدار ويعرضوا الكراسي دي للبيع ويحسوا بقيمة العمل اللي اشتغلوه بأيديهم"، يقول أسامة عبدالعزيز، مدير الدار، الذى يشجع الأطفال ويقدم لهم كافة الدعم، من خلال تنظيم جلسات لتعلم الفنون التشكيلية مرتين في الأسبوع: "الأطفال اللي في الدار موهوبين في الفن وتطوروا في الرسم واستخدام الألوان ومزجها بطريقة فنية، وفاجئوني أنا ومدربة الفنون بتاعتهم بالمنتج اللي طلع من تحت أيديهم".
ووفقاً لـ "أسامة"، جرى بيع كراسي كثيرة مؤخراً، وذلك فقط لأن صناعها من الأطفال الأيتام: "في متبرعين كتير حبوا يشجعوا الأطفال ويدعموهم وبيشتروا الكراسي مننا لدرجة أنها بقت تخلص بسرعة وحاليا مطلوب منهم أنهم يعملوا أعداد كبيرة تانية وده في حد ذاته بيحفزهم وبيخليهم مبسوطين إن التبرعات اللي بتيجي لهم علشان تعبهم".
يحصل كل طفل على 50 جنيهاً، على كل كرسي يشكله: "الـ350 جنيه بتروح للدار عشان نقدر نجمع ونشتري الكراسي اللي بيشتغلوا عليها والطفل بيتراضى على نتيجة تعبه ويتصرف بالفلوس براحته سواء بيحوشها أو يجيب حاجة بيحبها من الفلوس اللى كسبها بنفسه".
وأكد "أسامة"، أن هؤلاء الأطفال يعملون يومياً، في عدد لا يقل عن 10 كراسي، ويجري عرضها للبيع على موقع التواصل الاجتماعي "فيس بوك".
تعليقات الفيسبوك