ملامح وهيئة أوروبية، وسط أجواء مصرية داخل مترو الأنفاق وتحديدا بداية من محطة مترو السادات وحتى المنيب، يقف في العربة يرتدي بذلة سوداء اللون أنيقة، ويلتقط له مصور لقطات مختلفة تشبه "أفيشات" الأفلام جعلت كل المحيطين بهما ينظرون إليهما لمحاولة معرفة السبب.
"أنا شوفت سيشن كتير قبل كده معمول في المترو فكنت حابب ده بس عايز أعمل حاجة مختلفة".. هكذا بدأ محمد جمال خطاب حديثه لـ "الوطن"، الذي قرر الحصول على كادرات وسط المواطنين في عربة المترو ليظهر اختلاف الثقافات بين الشخص الأجنبي والمصري، كون الموديل يمتلك الجنسية الألمانية: "حبيت أجيب نظرات الناس لي وأنا بصوره وأوثق ردود الفعل".
بدأت الفكرة عندما اتفق مع الموديل "نيلز" على عقد جلسة تصوير له عند مجيئة إلى مصر داخل منطقة وسط البلد: "أنا أعرفه وهو كان قايلي أنه عايز يتصور في التحرير وعند المترو من فوق، ولما جه وعملت ده قولتلوا فجأة ما تيجي نتصور في المترو من جوه".
استقل خطاب وصديقه ونيلز عربة المترو من محطة السادات وبدأ التصوير بين كل محطة أثناء سير العربة حتى الوصول إلى المنيب ثم انتظر خروج الناس لالتقاط صور للموديل بمفرده أيضا، وعن ردود فعل الناس وفقا للمصور: "لما دخل كان لابس بدلة بقى والناس مستغربة وقعدوا يبصوا ويسألوا بتعملوا إيه بس كانوا ودودين ومرحبين بالموضوع".
واستغرق "السيشن" نحو 15 دقيقة أي الوقت من استقلاله العربة من محطة مترو السادات وحتى مترو المنيب: "عندي شغف اطلع حاجة مختلفة وحاجة مميزة سواء بأقل الإمكانيات أو بالإمكانيات اللي معايا فكري بياخدني للحاجات المميزة"، بحسب خطاب خريج كلية حقوق جامعة القاهرة.
خطاب الذي تعلم التصوير بنفسه لشغفه به، وضع طريقة مختلفة عن زملائه وهو الاهتمام بجعل الصور كأنها أجنبية وهو ما يظهر في سيشن مترو الأنفاق بكل وضوح: "اتعلمت التصوير بنفسي وبتابع الأجانب عشان الجودة والمعلومات فدي من أهم الحاجات اللي شكلت فكري إن لازم التصوير يبقى زي الأجانب بحيث اللي يشوف الصورة يفتكر حد أجنبي اللي مصورها".
ويحرص الشاب العشريني أيضا على تعديل الصور بعد التصوير بشكل سينمائي ليظهر بطريقة مختلفة ومميزة: "عايز أوصل أن اللي يشوف صوري يقول دي بتاعت خطاب"، كما أنه لا يتخصص في نوعية معينة من المناسبات حيث يشارك في حفلات الزفاف والأزياء والمنتجات.
ورغم أن التصوير كان مجرد هواية لخطاب إلا أنه أصبح عمله الأساسي بعد توقف عمله في السياحة بسبب فيروس كورونا: "كان بيجيلي شغل في وقت فراغي بس مكنش عمل أساسي، دلوقتي خليته كده".
وعبّر خطاب عن سعادته الشديدة بسبب ردود فعل المتابعين على جلسة تصوير الموديل الألماني: "مبسوط بيها جدا والناس بتقول إزاي ده في مصر أنا حسيته فيلم إجنبي، ده تصوير حلو أوي".
تعليقات الفيسبوك