دوري للمتزوجين
"نداء إلى السادة المتجوزين سيبوا بيوتكم وانزلوا ألعبوا واستعيدوا لياقتكم سيبكم من الكرش"، دعوة غريبة أطلقها أحمد بكر، أحد سكان الشروق، بهدف جذب الرجال المتزوجين بمدينتي الشروق والعبور، للمشاركة في مباراة كرة قدم يستعيدون فيها لياقتهم البدنية ورشاقتهم وقوامهم الممشوق، وتكوين صداقات جديدة وتوطيد جيرتهم.
ينظم "أحمد" مباراة أسبوعية للسكان خاصة المتزوجين منهم، داخل أحد الملاعب الخماسية، في مباراة ودية مدتها 15 دقيقة فقط: "أغلب اللي بيتجوزوا بيقعدوا في البيت يقفلوا على نفسهم وحياتهم بتبقى روتينية جداً وللأسف اللياقة البدنية بتاعت الشباب بتروح والوزن بيزيد جداً والكرش طبعا بيظهر، والواحد فجأة بيحس نفسه أنه كبر في السن وعجز وهو لسه في عز شباب عشان كده عملت الايفينت"، بحسب "أحمد"، وبدأ في تنظيم هذه المباريات منذ 3 سنوات، بالتزامن مع انتقاله للإقامة بمدينة الشروق.
ويقيم "أحمد" أيضاً دوري كرة قدم بين 4 فرق من مدينتي الشروق والعبور، وتحصل الفرقة الفائزة على ميدالية ذهبية والأخرى برونزية، وهناك ألقاب لأحسن هداف وأحسن خُلق وثبات انفعالي خلال الدوري: "والجايزة دي تحديداً بتروح للشخص اللي مش بياخد إنذارات كتير وكان قائد منظم لفرقته وده بيكون نموذجا ومثالا للفرق التانية"، ووفقاً لـ"أحمد"، تتم المباريات في نظام شديد، وهناك إقبال وتفاعل كبيران بين السكان الذين يتواصلون معه للحجز: "فيه سكان كتير استعادوا حيويتهم ونشاطهم بالمباريات اللي بنعملها دي وخسوا معانا لأنها كمان رياضة كاريود وبخلاف كده قدرنا نتعرف على معظم السكان في المدينتين وبقينا عزوة في قلب بعض وبقى لينا يوم وسبب بنتجمع عشانه كل أسبوع".
وتختار كل فرقة ملابس رياضية ذات لون وشكل واحد، حتى يتم التفريق بين الفرق المشاركة: "كل فرقة بتختار اسم لها وقائد وحارس المرمى بتاعها وهما اللي بيحددوا مع نفسهم أهم حاجة بين الفرق أنهم متفاهمين جداً"، وبحسب "أحمد"، لا يشترط سن محدد للانضمام إلى المباريات.
تعليقات الفيسبوك