ارتفعت أسعار الغُسل للمتوفين بفيروس كورونا، وتراوح بين 5 و7 آلاف جنيه، بسبب استغلال بعض المغسلين لرفض الكثيرين تغسيل موتى كورونا، الأمر الذي دفع 5 متطوعين بمدينة بيلا في كفر الشيخ، إلى تقديم خدمة الغُسل والأكفان مجاناً، بهدف القضاء على هذا الاستغلال.
رغم خطورة موقفهم، إلا أنهم ثابتون يحاولون التصدي للاستغلال وتقديم الخدمة تطوعية: "من أول يوم انتشار الوباء مش بناخد جنيه من حد بل بالعكس بنشتري الكفن على حسابنا لأن أهالي المتوفين بيكون حالتهم صعبة ومحدش مركز يشتري حاجة"، بحسب عصام حمدان أحد المتطوعين، ويحرص على تقديم الخدمة في كافة مدن وقرى المحافظة وخارجها أيضاً: "بنخرج كلنا مع بعض مرة واحدة نروح الغُسل أو نقسم بعضنا لو عندنا أكتر من حالة وفاة"، ولم يشعر "عصام" أو زملائه المتطوعين بالخوف أو القلق من الإصابة بالفيروس، فكل ما يحرصون عليه هو أن يواجهوا الاستغلال والابتزاز من بعض المغسلين: "يعني الناس معها فلوس تتعالج لما هتدفع الآلاف عشان تتغسل واللي بيعملوه ده حرام ده ربنا قال ووصى على إكرام الميت بدفنه".
يرتدي "عصام"، أثناء الغُسل بدلة كورونا المعقم، وسعرها 50 جنيهاً: "دي بنشتريها على حسابنا ومحدش بيدفع لنا جنيه لأننا مش تابعين لأي مؤسسة أو جمعية خيرية إحنا الـ 5 متطوعين هدفنا نواجه الاستغلال ونكرم الموتى قبل مثواهم الأخير"، ووفقاً لـ "عصام"، فبعد الانتهاء من الغُسل يقوم بالتخلص من البدلة بحرقها ورميها في القمامة حتى لا تؤذي أحدا: "الحامي هو ربنا ومش خايفين طول ما ربنا يسهلنا الدنيا وحاطط في موقف مساعدة للناس يبقى هنساعد ومحدش يدفع فلوس، لأن في مغسلين كتير مبقاش عندهم ضمير بيدوسوا على أوجاع الناس عشان الفلوس ولما بدأنا نعمل كده ونتطوع طبعا زعلوا جداً لأنهم خسروا مصلحة فلوس كبيرة".
تعليقات الفيسبوك