في مشوار البحث عن سكن راقٍ ودون كلفة عالية، سقط 4000 مواطن في فخ النصب وراح «شقى عمرهم» على يد إحدى الشركات العقارات داخل أبراج الجوهرة في منطقة المعادي، والتي يملكها محام قام بخداعهم، واهما ضحاياه بأن الشركة تقدم خدمات تسهيلية ومنها مبادرة تخفيض بامتلاك وحدات سكنية بأسعار تقل 30% عن سعر السوق، وبهذه الطريقة كان يستقطب ضحاياه وجمع 2 مليار و300 مليون جنيه واختفى.
شقى عمري راح
في عام 2018، كانت دعاء منير من سكان منطقة المريوطية، وإحدى الضحايا، قرأت إعلان على السوشيال ميديا عن مشروع عقاري على كورنيش المعادي بأسعار مخفضة، وهو ما أغراها للبحث عن رقم التليفون والاستفسار عن إمكانيات وسبل الدفع مقابل امتلاك وحدة، وبالفعل دفعت مبلغ 520 ألف جنيه، دفعات أولية لاستلام «شقة العمر» كما حلمت: «خلانا نمضي على عقود موثقة في الشهر العقاري ومش عليها أي غبار نهائي وفي الأخر بعد 3 سنين من دفع الفلوس بعدي من قدام المشروع بالصدفة مالقيتش عمود واحد طلع في الأرض واتصدمت ولما كلمته قال في شوية مشاكل بس على الأرض والسيولة وهنبني».
اضحك علينا
مدحت السيد أحد المتضررين، أحد سكان المعادي، والذي دفع 875 ألف جنيه، دفعات تقسيط لامتلاك شقة بمساحة 180 متراً على كورنيش المعادي، وهي تعتبر من أرقى المناطق السكنية: «أي حد مكان عايز يغير مكان سكنه لمنطقة أفضل وخدمات أحسن وكمان سعرها أقل من السوق بـ 30% زي ما كان مفهمنا في المبادرة كان هيجري يروح يدفع الأقساط وده اللي أنا عملته فعلا» ووفقاً لـ «مدحت» كان نظام السداد بدفعة عند التعاقد 30% ودفعة قبل الاستلام بسنة 30% وباقي المبلغ يتم تقسيطه على 5 سنوات: «اتضح أن المحامي اللي نصب وضحك علينا وخد فلوسنا كان بيبقى شاري قطعة أرض بالتقسيط ويعمل عليها إعلان ببناء وحدات سكنية بخدمات ممزية وأسعار رخيصة فالناس تروح تحجز وبعد ما يلم الفلوس ميدفعش باقي الأقساط فالأرض بتنسحب منه وإحنا فلوسنا تضيع علينا».
تعاون الضحايا وقدموا جميعاً بلاغاً ضد هذا المحامي لدى النائب العام بقضية رقم 1145 لسنة 2020، وبالفعل قد صدر قرار بضبطه وإحضاره ومنعه من السفر في تاريخ 21 يونيو لعام 2020: «بس للأسف لحد دلوقتي مش لاقينيه وعايزين حقوقنا».
جوزها طلقها
حالة من الحزن والاكتئاب الشديد انتابت هؤلاء الضحايا: «في واحد من اللي اضحك عليهم جاله جلطة في القلب وواحدة كانت حامل لما سمعت الخبر اجهضت طفلها وفي واحدة كانت متجوزة جوزها طلقها لأنه مغترب وقال لها إنتي بضيعي فلوس وشقى عمري واتعصب عليها وراح مطلقها».
تعليقات الفيسبوك