شوقي يوضح أهم نصيحة لطلاب الثانوية العامة: «قولتها من 2018 ومحدش اهتم»
الدكتور طارق شوقي .. وزير التربية والتعليم والتعليم الفني
تحدث الدكتور طارق شوقي، وزير التربية والتعليم والتعليم الفني، عن أهم نصيحة يقدمها لطلاب الثانوية العامة قبل بدء امتحاناتهم، قائلا «هي مش نصيحة جديدة، إحنا بنقولها من 2018 ومحدش اهتم بيها من الطلاب، لما الولاد بقى اللي كانوا في أولى ثانوي وصلوا للشهادة الثانوية عرفوا قيمتها، والنصيحة هي تغيير نظام التعلم، بنعرفهم أن طريقة التقييم بتتغير، وده يقتضي نغير في طريقة التعلم، الطلاب عاوزين الأسئلة مباشرة ودي مش هتقيس فهم المواضيع».
وأضاف «شوقي»، خلال مداخلة هاتفية في برنامج «حضرة المواطن»، مع الإعلامي سيد علي، على شاشة «الحدث اليوم»، أنه منذ 3 سنوات وهو يعطي نصائح للطلاب بأن أسلوب أداء الامتحان ليس القضية، «مش القضية إني أكتب على شاشة ولا تابلت، التابلت مش عشان تمتحن عليه في المقام الأول، ده عشان توصل للمحتوى اللي نفسنا يذاكروا منه، عاوزين من كل درس تطلع باللي فهمته منه، مش تحفظ الدرس، إحنا بنديك مصادر كتير تساعدك أوعى تفتكرها عبئ عليك».
وأوضح وزير التربية والتعليم، والتعليم الفني، أن تلك المصادر ليست للحفظ كما كان في التعليم القديم، لكن لاختيار ما يُناسب الطالب كي يكون أكثر قدرة على فهم الدرس فقط، «مش مفيد إني أحفظ حاجة عشان أدخل الامتحان، وبعدين أنساها وأنا خارج، فيه طلاب انتبهوا للعملية دي من وهما في أولى ثانوي بس كانوا أقلية، لما الطلبة بقى وصلت للشهادة الثانوية كلهم عرفوا أهمية مصادر المعرفة والتابلت والمنصات التعليمية، بقى يدركوا ده دلوقتي».