مشروع تخرج «هيصة»
«هيصة».. اسم يشير إلى الفرحة عندما تقع العين عليه للوهلة الأولى لكنه في حقيقة الأمر يشير إلى مشروع تخرج مجموعة من طلاب قسم إعلام سياسي بكلية إقتصاد وعلوم سياسية، والذي يعد القسم الوحيد الموجود بجامعة المستقبل، مقررين من خلاله دمج الإعلام بالسياسة.
آية أيمن، إحدى طلبة مشروع تخرج «هيصة»، روت لـ«الوطن»، تفاصيل فكرة المشروع:«عددنا فى المشروع 6 ولما جينا نعمل مشروع التخرج، قررنا ندمج الإعلام بالسياسة، مش مجرد فيلم وخلاص جتلنا فكرة إن يكون لينا دور في دعم السياحة المصرية داخلياً وخارجيا،ً ومن هنا إختارنا النوبة».
أسباب عديدة وراء اختيار النوبة المنبع الأساسي وراء اسم المشروع، بحسب «آية» التي قالت:«بما إن النوبة هى زينة النيل، فقررنا نركز على النيل واللي بتمتلك النوبة على ضفافه جزيرة هيسا، وهى أقدم جزيرة، وعشان كده الفيلم اتسمى على اسمها».
واستكملت «آية» حديثها: «وغيرنا الاسم لأن بقت تنطق الجزيرة بهيصة مش (هيسا) وعرفنا عاداتهم وتقاليدهم، أما تانى قيمة للفيلم إننا عايزين ندخل حالة من الهيصة والفرحة والسعادة لأى حد بيتفرج، من خلال الحفلات فى الفيلم والأفراح والأغاني، وصورنا أماكن في النوبة لأول مرة تتصور وتتذاع زى شاطئ تنجار».
وتابعت الطالبة المشاركة في هيصة: «كنا أول جروب مشروع تخرج فى الجامعات يدخل على لجنة التحكيم قبل عرض الفيلم بأغنية نوبية والتطبيل على الدف، لعمل حالة (الهيصة) ووقتها الناس اتفاعلت معانا واللجنة كانت مبسوطة مننا، وقالونا عرفتوا تعملوا هيصة قبل ما تعرضوا هيصة».
وحصد «هيصة» على المراكز الأولى، بعد ما أدخل البهجة على المشاهدين ولجنة التحكيم، بحسب «آية»، التي أكدت: «هيصة هو الفيلم الوحيد من 7 أفلام مطلعش فيه غلطة، إحنا معندناش مراكز، اللجنة مبتعلنش مين طالع الأول ومين التانى، بس اللجنة قالتلنا إننا فى المراكز الأولى، وأشادوا إن الفيلم لازم يدخل مهرجانات لدعم السياحة».
تعليقات الفيسبوك