«معتز» يزف العرائس بسيارة عمرها 43 سنة في كفر الشيخ: «عمري ما أبيعها»
سيارة زفاف تاريخية في كفر الشيخ
سيارة صفراء صغيرة الحجم تغزو شوارع كفر الشيخ، يستوقف المواطنون صاحبها «معتز صلاح»، لالتقاط بعض الصور التذكارية معه أثناء سيره في شوارع المدينة، لكنهم لا يعملون أن تلك السيارة يستخدمها صاحبها في زفاف عشرات العرائس، اللواتي تفضلن أن تكون زفتهن كلاسيكية.
سيارة عتيقة أكثر ثباتاً على مستوى العالم
«اشتريت العربية دي من 40 سنة، هي سيارة فولكس فاجن إنتاج عام 1979، يعني من 43 سنة، وعمري مافكرت أبيعها، بأستخدمها في قضاء مشاويري، ولكن لما لقيت الناس بتحبها وتستغربها وبتطلب تتصور معايا، علشان شكلها صغير وهما مستغربينها بتفكرهم بالزمن الجميل، وعيالي اتحايلوا عليا أبيعها كذا مرة، لكن أنا رافض، دي سيارة عتيقة ومن أفضل السيارات على مستوى العالم، وأعلى ثباتاً على مستوى العالم على الطرق وفي المنحنيات كمان».
البعض مستعد لدفع الملايين لشراء سيارة عتيقة
«موتور دينامو، وبوجيه وماكينة حرف جي، وبستم شمال ويمين، وشكل بومبيه، وتبريد هواء»، تلك هي مواصفات السيارة وفقاً لـ«صلاح»، الذي تابع بقوله: «العربية دي أول عربية تبريد في العالم بدون احتياج لمياه، وألمانيا كانت صنعتها علشان هي قوية، والتابلوه عداد ولمبات تنور للزيت والإشارات، وتعمل بكفاءة رغم مرور 43 سنة على تصنيعها، في ناس مستعدة تدفع ملايين الجنيهات علشان تشتري عربية زي دي».
نادي لسيارات الفولكس القديمة
شكل السيارة ملفت، لذلك فإن العديد من العرائس في كفر الشيخ ينجذبن إليها ويفضلن الزفاف فيها، حيث يقول «صلاح» إن «العرايس عاجبهم العربية علشان شكلها حلو وصغيرة وغريبة، وفيه منها 30 مليون نسخة، وفيه نادي مختص للعربيات دي، وبنعمل سفريات ورحلات وسفاري وبتقطع عشرات الآلاف من الكيلو مترات، وأصحاب الاستوديوهات بيطلبوها علشان يعملوا سيشن الأفراح والخطوبة بيها».
لم يفكر الرجل البالغ من العمر أكثر من 50 عاماً، في أن يستخدم سيارته في حفلات الزفاف والتصوير، لكنه لم يتردد منذ سنتين في فعل ذلك: «مكنتش بأفكر استخدمها في حفلات الزفاف، لكن فيه واحد صاحب مكان سيشن تصوير طلبها مني علشان العرايس، ومن هنا فكرت في استخدمها لزفاف العرائس، وكان الموضوع ده ليه صدى في كفر الشيخ، الكثير من الفتيات بيطلبوها».
لا يفكر «معتز» في بيع السيارة، رغم مرور 43 عاماً على تصنيعها: «عمري ما فكرت أبيعها، دي زي عيالي، وفي غلاوة عيل منهم، غيرت عليها 6 عربيات، لكن مبفكرش أبيعها».