أنواع مختلفة من الياميش يعرضها «سيد» فى السيدة زينب
«الحلو للحلو، بلح وزبيب أشكال وألوان، وبأسعار على قد الإيد»، قالها «عم سيد»، مغازلاً المارة فى حى السيدة زينب بالقاهرة من أمام فرشته التى تحتوى على ياميش متعدد الألوان والأشكال، إذ يقف الرجل الستينى ليجتذب الزبائن ويرسم البسمة على وجوههم بكلماته اللطيفة.
سيد يحيى، صاحب أشهر فرشة ياميش بحى السيدة زينب، يوضح لـ«الوطن» أنواع البلح المختلفة التى يبيعها للزبائن: «عندى أنواع بلح كتيرة، لازم الناس تعرف تفرّق بينها، وتعرف إيه ينفع للخشاف وإيه ينفع يتاكل عادى، عندى بلح عينات ده بينفع للخشاف، لأنه ناشف والسكر بتاعه قليل، الكيلو عامل 48 جنيه، وفيه بلح ملكابى ناشف بس لونه أسود ونفس طعم الخروب بـ32 جنيه، غير طبعاً الشامية والوادى، ولو عايز حاجة سعرها حنين فيه بلح الواحات بـ24 جنيه».
الزبيب من أهم أنواع الياميش التى يعرضها «عم سيد» على فرشته بأنواع وألوان كثيرة: «فيه زبيب أحمر مصرى سعره 65 جنيه، وفيه زبيب بناتى سعره 80 جنيه، والزبيب الإيرانى بـ100 جنيه».
إلى جانب البلح والزبيب، يستعرض «عم سيد» أنواعاً من قمر الدين والتين المجفّف وغيرها من أصناف الياميش المحبّبة للمصريين، كما روى لـ«الوطن»: «الفرشة فيها كل اللى نفسك فيه، قراصيا، تمر هندى، مكسرات بأنواعها: عين جمل، فستق، لوز، كاجو، بندق، كله متوفر، أنا زباينى كتير جداً، لأن رجلى فى المكان من أيام أجدادى، إحنا تاريخ العيلة هنا فى السيدة من 100 سنة، المكان فيه روحانيات عالية، وما زلنا محافظين عليها».
تعليقات الفيسبوك