رحلة مجانية لأطفال أيتام ومسنين
يرتدون ملابسهم البسيطة للسباحة داخل المياه بأحد شواطئ العين السخنة في رحلة مجانية نظمتها سمر يسري للأطفال الأيتام والمسنين داخل مؤسسة خيرية، لترسم البهجة على وجوههم بعد رؤيتهم «البحر» للمرة الأولى في حياتهم.
تبرعات جمعتها سمر يوسف، رئيس مجلس إدارة إحدى المؤسسات الخيرية في قويسنا التابعة لمحافظة المنوفية، لتنظم رحلة مجانية حتى يتمكن الأطفال الأيتام والمسنين من رؤية البحر للمرة الأولى، وفقا لما روته لـ«الوطن»: «80 فردا من قرى مختلفة بقويسنا من أطفال أيتام لمسنين، ميعرفوش يعني إيه ترفيه، ده خلاني فكرت في توفير رحلة ليهم للبحر زي ما بنعمل مع ولادنا».
فرحة عارمة ظهرت على وجوه الجميع بمجرد علمهم بالرحلة، هكذا وصفت «سمر» حالة الأطفال الأيتام والمسنين: «مكنوش مصدقين أول ما اقترحت عليهم الفكرة، فقررت اكتبها على جروب الفيسبوك الخيري كالعادة، وفعلا الناس تفاعلت معانا بسرعة جدا، واحد كلمني وقالي حجزتلكم مع شركة رحلات، وواحدة تكفلت بإطعام اليوم كله، وماركت وفرلي عصير وبسكويت، ومسؤول في القرية تكفل بتخفيض كبير للرحلة مخدش غير 500 جنيه فقط».
17 ساعة استغرقتها مدة الرحلة الخيرية، استمتع خلالها الأطفال والمسنين، وفقا لمديرة المؤسسة: «الرحلة استغرقت 17 ساعة، وأول ما وصلوا فيهم ناس ما استنوش يغيروا هدومهم، ونزلوا البحر على طول، لدرجة أن واحدة منهم اسمها الحاجة سناء، نزلت البحر مطلعتش طول الرحلة غير واحنا مروحين لما المنقذ راح جابها، وكنت ببعتلها الساندوتشات معاه طول قعدتنا على الشاطئ، ومسن آخر عنده 60 سنة، كان بيبص للسماء كل شوية ويبوس إيده، ولما سألناه عن السبب قالنا أنه كان بيدعي ربنا يشوف البحر قبل ما يموت».
سنة واحدة فقط على تأسيس «سمر» للمؤسسة الخيرية، إلا أنها لاقت رواجا كبيرًا على مواقع التواصل الاجتماعي: «بندخل الأطفال الأيتام والمعاقين والمسنين، بنعمل بحث اجتماعي، وبناء عليه بنحدد محتاج فعلا يدخل ويبقى تحت رعاية المؤسسة ولا لأ».
«هنحاول نسعدهم كل سنة على الأقل مرة»، تلك هي أمنية «سمر»: «أمنيتنا الوحيدة إننا نقدر نلاقي متبرعين يتكفلوا برحلاتهم علشان نكرر فرحتهم في أماكن مختلفة».
تعليقات الفيسبوك