فيديو متداول لأب يُيسر زواج ابنته ويوجه رسالة للعريس: «جهز على قد إمكانياتك»
فيديو متداول لأب يُيسر زواج ابنته ويوجه رسالة للعريس: «جهز على قد إمكانياتك»
في الوقت الذي أصبح فيه الزواج رحلة مليئة بالتحديات والتعقيدات، نتيجة تقاليد متوارثة مثل المهر والقايمة والتجهيزات الكثيرة التي تطلب دفع تكاليف عالية، بدأ الكثير من الشباب يشعرون بالخوف والتردد قبل خوض هذه الخطوة المهمة، ومع هذا الواقع، برز فيديو مؤثر لأب يحاول بكل ما أوتي من حنان وتفهّم تيسير زواج ابنته، مُعبّرًا بكلماته اللطيفة عن دعمه لشاب يرى فيه ابنًا قبل أن يكون صهرًا، ليُعيد الأمل ويُظهر جانبًا إنسانيًا نادرًا في ظل ضغوط الحياة.
فيديو متداول لأب ييسر زواج ابنته.. بنشتري راجل
في الساعات الماضية، تداول رواد مواقع التواصل الاجتماعي مقطع فيديو من حديث أب في جلسة اتفاق زواج ابنته، قال فيه: «علشان الحماتين يبقوا عارفين هيقدملك شبكة على قد إمكانياته، الجهاز بالنص ولو حاجة خارجة عن الإمكانيات أنا هصد، إن شاء الله ربنا يكرم».
وفي رسالة للعريس قال الأب: «أنا بشتريك ابن ليا، الفرح على قد إمكانيات محدود عائلي، حاجات محدودة صغيرة عشان ميبقاش في تكاليف عليه جامدة، علشان بردو لو حابب يسافر، بردو الرزق بتاع ربنا، فالأمر في منتهى البساطة خالص».
تعليقات المتابعين على الفيديو
أشاد الجمهور بموقف الأب، وكتب أحد المتابعين: «الكلام ده اللي يخلي الشاب يعمل أكتر ما في مقدرته، الشباب مش بتحب العند، الشاب تقول له مش عايز منك حاجة تلاقيه عمل كل حاجة اللي يقدر عليه واللي ميقدرش عليه، لكن لو قولته عايز وعايز وتحط له شروط، والله لو في مقدرته كل حاجة ما هيعمل ولا حاجة، ببساطة الراجل ممكن يعمل أي حاجة طول ما حاسس إن اللي قدامه شاريه ومش بيلوي دراعه ولا طماعان فيه»، «أنت راجل محترم وإن شاء الله تكون جوازة مباركة».
وتحول سياق الحديث من تيسير الأب زواج ابنته للحديث عن قائمة المنقولات، ووجه البعض رسالة للمقبلين على الزواج قائلين: «محدش يمضي قايمة يا شباب، جهز شقتك كلها من جيبك على قد مقدرتك وادفع مهر برضه على قد مقدرتك، واختر الزوجة الصالحة ومتتجوزش بقايمة».
