حسام داغر يشارك في تريند «صورتك مع المشاهير» ويرثي والدته الراحلة
حسام داغر يشارك في تريند «صورتك مع المشاهير» ويرثي والدته الراحلة
رثى الفنان حسام داغر والدته بكلمات مؤثرة مستعينًا بتريند «صورتك مع المشاهير» الذي تداوله رواد موقع التواصل الاجتماعي فيس بوك.
داغر لوالدته الراحلة: «بدور عليكي في كل أمهات أصحابي»
ونشر داغر صورة تجمعه بوالدته الراحلة معلقا: «وحشتيني قوي يا ماما، وحشتيني قوي، لما لقيت الناس بتعمل الصور بالبرنامج ده قلت فرصة كويسة نتصور كأننا اتصورنا صورة جديدة سوا، ليه ما يخترعوش برنامج أدخل فيه الفويسات بتاعتك على الواتس آب وماسنجر وانتي بتصبحي عليا وتقوليلي صباح الخيرات يا حبيبي أو صباح الخير يا قمر الحلوين زي ما كنتي مسمياني على أغنية فيروز».
وتابع داغر: «والبرنامج ده ياخد بصمة صوتك ولما أفتحه يرد عليا ويتكلم عادي زي شات جي بي تي ده على الأقل هسمع صوتك كتير ولو عندي سؤال هسأله ويرد عليا كأنه انتي، أو يبقى نفس تفكيرك وردودك بدل ما أنا بدور عليكي في كل أمهات صحابي».
داغر راثيا والدته: يا ريت أرجع يوم واحد نتكلم فيه سوا تاني
واختتم حسام داغر: لما قلت لصحابي على فكرة البرنامج ده قالولي متفكرش كده وادعيلها بس، بس برجع أقول يا ريت أرجع يوم واحد نتكلم فيه سوا تاني وأحكيلك اللي بيحصلي وآخد رأيك، أنا حتى وأنا بكتب الكلام ده دموعي بتخوني تاني ونازلة على وشي، الله يرحمك يا حبييتي، الله يرحمك يا أمي.
