تعمل إيه لو ربنا رزقك بـ7 توائم ببطن واحدة؟.. حالة مسلسل كارثة طبيعية
تعمل إيه لو ربنا رزقك بـ7 توائم ببطن واحدة؟.. حالة مسلسل كارثة طبيعية
في استطلاع رأي حول حالة «محمد» في مسلسل كارثة طبيعية، الشاب الذي فوجيء بولادة زوجته سبعة توائم دفعة واحدة، ووجد نفسه غير قادر على مواجهة الحياة والتغلب على معاناته، اعتبر بعض الشباب أن الموقف كوميدي، إذ طرح كل منهم طريقته الخاصة للتعامل مع هذه الكارثة، بدءًا من تجهيز قصر صغير داخل المنزل، إلى تعيين فريق من المربيات، أو حتى تحويل البيت إلى سيرك كوميدي.
تدور قصة مسلسل كارثة طبيعية، حول «محمد»، يعمل في شركة اتصالات، ويحصل على راتب بسيط، ليواجه مشاكل كبيرة، لا يستطيع من خلالها الإنفاق الجيد، خاصة بعد ولادة زوجته «شروق» 7 أطفال مرة واحدة.
استطلاع رأي حول حالة «محمد» في مسلسل كارثة طبيعية
يرى محمد سليم، البالغ من العمر 34 عامًا، في حديثه لـ«الوطن»، أن الأمر سيحمل طابعًا كوميديًا بالنسبة له: «هعمل غرفة نوم ضخمة جدًا، دة أنا مش بس هغير الأثاث، لأ دة أنا محتاج أبني قصر صغير جوة البيت، أعمل سرير كبير لكل طفل، وهعين فريق كبير من المربيات، كل يوم تيجي مربية، عشان مش معقول واحدة تقدر تستحمل 7 أطفال كل يوم، دي ممكن تتجنن على الآخر، ده غير إن كل واحد هيطلب أكل مختلف، لبس مختلف، وطبعًا محمد سلام مفيش اتنين يختلفوا عليه».
أما أحمد إبراهيم، البالغ من العمر 27 عامًا، قال: «بصراحة كدة المسلسل جامد جدًا، وطبعًا أنا لو مكانه، هبقى مش عايز فرهدة، عشان كدة هعلمهم السحر، كل واحد هيكون عنده تعويذة خاصة، يعني البيت يتحول لسيرك كوميدي».
يرى حسن أبو سلامة: «بصراحة هتبقى صدمة كبيرة بالنسبة، وممكن أفكر أهرب بهزر طبعًا، الموضوع مش هيكون سهل عليا خالص، لأن الطفل الواحد بيحتاج ميزانية لوحده ما بالكم بـ7 أطفال، أكيد هيبقى عندي مشاكل كبيرة في الفلوس، وهواجه أزمة حقيقية، كل لما العيال تكبر».
أما علي راشد، البالغ من العمر 37 عامًا، أوضح: «هعمل حديقة ملاهي في البيت، كل توأم عنده لعبة مختلفة، المصعد مثلا هحوله لترامبولين، والكرسي المتحرك لقطار سريع، كل يوم مغامرة جديدة وفوضى كوميدية مستمرة».
فريق عمل مسلسل كارثة طبيعية
يشارك في مسلسل كارثة طبيعية نخبة كبيرة من النجوم على رأسهم محمد سلام، جهاد حسام الدين، كمال أبو رية، حمزة العيلي، العمل من تأليف أحمد عاطف فياض وإخراج حسام حامد.
