محمود الجارحي يكتب: محمد صبري.. في رحمة الله وكلمات تبكي القلب
محمود الجارحي يكتب: محمد صبري.. في رحمة الله وكلمات تبكي القلب
السادة المتابعون.. أهلاً بحضراتكم جميعًا.. أنا محمد صبري.. لاعب الزمالك السابق.. واحد من الناس اللي كان نفسه يعيش عادي.. يلعب.. يشتغل.. يضحك.. ويرجع آخر اليوم يطبطب على ولاده ويقول لهم.. لسه في بكرة أحلى.. أنا عارف إن دلوقتي في مكان أفضل.. أنا بين يد الله.. بين يد رب العلمين.
اسمحولي أتكلم.. أعتذر أنني أوجعت قلوبكم وأبكيتها.. لم أقصد.. لم أتعمد.. صباح يوم الجمعة اللي فاتت والله كنت أسير في أمان وهدوء وتركيز.. كنت سايق عربيتي في طريق جانبي في التجمع الخامس.. الطريق كان هادي.. وأنا ماشي في طريقي حسّيت بوخزة ألم في صدري.. وجع مش مفهوم.. مدّيت إيدي على قلبي.. واتنفست بصعوبة.. واتصلت بزوجتي.. قلت لها بصوت متلخبط.. حاسس بحاجة غريبة.. رايح على المستشفى.. خليكِ مستعدة.. كنت خايف.. بس كنت فاكر إنها حاجة وهتعدّي.
الصوت قطع… وأنا كمان قطعت عن الدنيا بعدها بثواني.. العربية انحرفت.. واصطدمت بجدار مبنى تحت الإنشاء..
وما حسّيتش بنفسي من بعدها.. مش عارف إيه بيحصل حواليّ ولا حاسس بأي حاجة.. يقينًا صرخت.. وأنا أحاول تحريك ذراعي.. لكن لم أتمكن..
وجدت نفسي غارقًا في بركة من الدماء.. كنت أشاهد الدماء تسيل من جسدي.. كان الوجع لا يُحتمل.. لم يستغرق كثيرًا ذلك الوجع.. فقدت الوعي بعدها بلحظات.. وصعدت روحي إلى بارئها..
تألمت كثيرًا.. هل تعلمون كم الألم..
سأبدأ بعائلتي الصغيرة.. فهي الموجوعة أكثر.. هي التي لا تنام.. لن أصف صرخة زوجتي أثناء تشييع جثماني.. ميزت صوتها.. كان صوتًا ضعيفًا من شدة البكاء.. هي اللي قالت.. كان دايمًا في ضهري.. كان راجل.. وكان سند.. وكان وكان وكان.
وسمعت صوت ابني.. الصوت اللي كنت كل يوم بستناه يرجع من المدرسة عشان يحكيلي عن ريال مدريد وبرشلونة.. الصوت اللي كان بيغير دمي من الضحك لما يقولّي.. بابا.. مخترع الإسبان.
لقيته بيقول.. يا بابا.. انت ربيتني على الرجولة.. انت اللي كنت بتجيبني من مدينة نصر.. وبتروح تاخد إخواتي.. وتودّينا التمرين.. وترجع لوحدك..
انت اللي قلت.. الفانلة البيضا تقيلة… مش لأي حد..يا بابا.. انت علمتني كل حاجة.. وسايبلي مسؤولية كبيرة..
ماما.. وإخواتي.. واسمك.
أنا دلوقتي بين يد الله.. في مكان أفضل.. أنا دلوقتي في سلام.. لكن قلبي معكم.. ومع كل واحد بيحبني.. أنا راضي.. ومطمئن.. وربنا معاكم دايمًا.
