أعرب النائب ثروت سويلم، وكيل لجنة الشباب والرياضة بمجلس النواب، عن عزمه تقديم طلب رسمي لتكريم منتخب مصر لكرة القدم، تحت قبة البرلمان، لافتاً إلى أن حسام حسن المدير الفني للمنتخب الوطني، قدم أداء بطولياً واستطاع إعادة الهيبة للكرة المصرية بتحقيق إنجاز فريد من نوعه في بطولة كأس العالم.. وإلى نص الحوار:

■ كيف تقيم أداء منتخب مصر في مباراة الأرجنتين؟ وهل كانت النتيجة تعكس مستوى اللاعبين؟

- أداء رجالنا كان بطولياً ويستحق كل التحية والتقدير، اللي شفناه في الملعب قدام الأرجنتين بطل العالم كان يليق باسم مصر وتاريخها، اللاعبون نزلوا إلى الملعب بروح قتالية عالية وقدروا يقفوا نداً لند أمام واحد من أقوى منتخبات العالم، لكن هل النتيجة تعكس المستوى؟ الإجابة قطعاً لا، اللى حصل في المباراة كان خارج إطار كرة القدم، واجهنا تحديات غير طبيعية، أبرزها الظلم التحكيمى الواضح وغياب تقنية الفار بشكل متعمد فى لقطات مؤثرة، كان فيه فساد واضح من الفيفا وتوجيه صريح للبطولة في اتجاه معين. ورغم كل هذا، قدم اللاعبون كل ما لديهم، الخسارة لا تقلل أبداً من المجهود الذي بذلوه، بالعكس دي تزيدنا فخر بيهم، إحنا خرجنا مرفوعي الرأس وأثبتنا إن الكرة المصرية قادرة تنافس الكبار.

■ ما الرسالة التي تود توجيهها للاعبين والجمهور بعد المباراة؟

- رسالتي للاعبين: ارفعوا راسكم لفوق، أنتم أبطال وأسعدتم 110 ملايين مصري، اللي عملتوه في كأس العالم إنجاز غير مسبوق وهيتحكى عنه سنين، أثبتوا للعالم كله إن المصري لما بياخد فرصته بيعمل المستحيل، أنا كوكيل لجنة الشباب والرياضة أعلنت بالفعل عن تقديم طلب للمستشار هشام بدوي، رئيس مجلس النواب، لتكريمكم تحت قبة البرلمان، لأنهم يستحقون ذلك وأكثر.

أما رسالتي للجمهور فهي: ادعموا ولادكم، المنتخب ده محتاجكم في المرحلة الجاية أكتر من أي وقت، الفخر اللي شفناه في عيون اللاعبين بعد المباراة لازم يقابله فخر مننا بيهم، خسارتنا كانت بسبب عوامل خارج الملعب، لكن مكسبنا الحقيقي هو جيل واعد وروح جديدة للمنتخب.

■ صرح الكابتن حسام حسن بأن عقده انتهى رسمياً.. من وجهة نظرك هل يستحق التجديد؟

- نعم وبكل قوة، الكابتن حسام حسن يستحق التجديد، هذا هو المدير الفني الأعظم في الكرة المصرية بشهادة الجميع، «الراجل تسلم منتخب كان فيه مشكلات كتير وقدر في وقت قصير يبنى فريق عنده شخصية ويقدر يقف قدام الأرجنتين في كأس العالم. حسام مش مدرب عادى، هو رمز وعنده غيرة على اسم مصر، عارف يعنى إيه يلعب باسم منتخب مصر وعارف يعنى إيه جمهور مصر، نجح يعمل توليفة بين الخبرة والشباب وزرع روح الانتماء فى اللاعبين، النتائج اللي حققها في التصفيات وفي المونديال بتتكلم عنه. تجديد عقد حسام حسن ليس رفاهية، بل ضرورة، إحنا محتاجين استقرار فني قبل الاستحقاقات الجاية، تغيير المدرب دلوقتي معناه إننا بنبدأ من الصفر تاني، وده حرام بعد المجهود اللي اتعمل.

■ لو لم يتم التجديد لحسام حسن.. ما مواصفات المدرب القادم؟

• رغم إني ضد فكرة التغيير، لكن لو حصل لأي سبب لازم نضع معايير واضحة، أولاً: مدرب عنده شخصية قوية ويقدر يسيطر على أوضة اللبس، منتخب مصر فيه نجوم كبار ومحتاج مدرب يحترموه، ثانياً: لازم يكون عنده خبرة بالكرة المصرية والعربية، مش عايزين مغامرات بمدربين أجانب ما نعرفش عنهم حاجة، ثالثاً: مدرب يؤمن باللاعب المصري ويقدر يطلع أفضل ما عنده، رابعاً: يكون عنده مشروع «مش جاى يلقط رزقه»، مشروع يستمر 4 سنين، لكن برجع وأكد، كل المواصفات دي موجودة بالفعل في حسام حسن، ليه ندور بره واحنا معانا كنز؟

استمرار حسام حسن

إيجابيات استمرار حسام حسن كثيرة جداً، أولاً الاستقرار الفنى، اللاعبون اتعودوا على فكره وطريقته، وأصبح بينهم كيمياء، ثانياً الشخصية، حسام حسن شخصية قوية بيعرف يتعامل مع الضغوط ومع الإعلام ومع اللاعبين النجوم، ثالثاً الوطنية، الراجل حاسس بالمسئولية وبيشتغل من قلبه علشان اسم مصر، رابعاً هو نجح يرجع هيبة المنتخب، بقينا بنلعب واحنا راسنا مرفوعة، خامساً، عنده رؤية طويلة المدى وبدأ بالفعل يجهز عناصر للمستقبل. أما السلبيات فأنا شايف إنها لا تذكر مقارنة بالإيجابيات، ممكن البعض يتكلم عن العصبية الزائدة أحياناً، لكن دى نابعة من حرصه وغيرته، وفى الآخر المدرب الناجح هو اللي بيكسب، وحسام كسب احترام العالم كله في المونديال.

• الفريق الوطنى
• كأس العالم
• الأرجنتين
• حسام حسن