مربعات..
إيه الدوا يعمل والنفس أصل الداء
غيرة ومحبة تملك خباثة واستعلاء
اللي تهابه تنافقه.. واللي يخافك أكيد
ملهش أي عزاء
-----
قلبك قليل النظر مش ستة على ستة
ياللي أنت أصلك روح ومتحامي في الجتة
في بلاد بلعها البحر ولما كالها السمك
مافضلش من اسمها فتفوتة أو حتة
-------
طاووس ومش همك
والطين نسيج دمك
فرحان بنفسك ليه
والرحلة في آخرها الأرض هتضمك
------
يا أعقل العقلاء
يا حفنة من أشلاء
إزاي هتمسك سما
وبناها كله هواء
-------
نفسك خروج ودخول
عنه أنت مش مسؤول
وكتير بياخدك غرورك
فتهندس المجهول
------
تراب يورث تراب
زيف الحياة الكداب
طمع ينسي حقيقة
إن اللي راحل هيرحل
ومتاعه راح يتساب
