رمضان زمان.. الوصايا العشر.. لمكافحة الذباب فى العيد
ماري منيب
ماري منيب: دى النظافة شىء بإيدى أنا، مش بإيد أى إنسان تانى..
لازم أراعى بيتى بنظرى إن كنت ست غنية، وأراعيه بإيدى إن كنت ست متوسطة، وبكده أضمن صحتى، وصحة جوزى وأولادى.. وفيه عشر وصايا، لو قدرتى تنفذيهم، تضمنى إنك حافظتى على بيتك، وتكونى فى الوقت نفسه اشتركتى فى حملة مكافحة الذباب..
أولاً - حطى على الشباك ستاير سلك بين الخشب والزجاج، والشباك الواحد مايكلفكيش أكتر من خمسين قرش، ويعيش معاكى العمر!
ثانياً - فيه حاجة اسمها «فليت» لتنظيف البيت من الذباب، والصفيحة كلها بـ18 قرش، وتقعد عندك شهر!
ثالثاً - الزبالة مش لازم تتوجد فى البيت مطلقاً، لازم يكون عندك زبالة بغطاء محكم بستين، وسبعين قرش الزبالة، تعيش معاكى سنتين تلاتة..!
رابعاً - لازم تكونى نظيفة فى بيتك مش العيال ياكلوا البرتقال، ويرموا القشر على الأرض، ييجى الطير يعف عليه..!
خامساً - اقفلى الشبابيك، واتركى جزء صغير منها مفتوح، وهشى الدبان فيهرب فى الحال، لأنه مايحبش الضلمة.
سادساً - ماتسيبيش اللحمة والخضار بجوار الشبابيك المفتوحة، علشان مايعفش عليها الدبان، وكذلك ماتهويش الحلويات فى جو مكشوف إلا إذا كنتى عاملة احتياطاتك..!
سابعاً - إذا كان عندك كلاب أو قطط، تنضفيها وتحميها أول بأول، مش تسيبى الطير يعف عليها، وعلى فلذات كبدك اللى بيلعبوا معاها..!
ثامناً - وكله كوم والمجارى العمومية كوم، لو انسدت عندك بلاعة لازم تصلحيها فى الحال، وتلاحظى دورة المياه باستمرار، أو تنظفيها بنفسك إذا لزم الأمر..!
تاسعاً - وماتسمحيش للأولاد أبداً إنهم يشتروا جيلاتى أو دندرمة من العربيات اللى بتدور فى الشارع، لأنها مليانة أمراض وميكروبات والدبان دايماً حاطط عليها..!
عاشراً - وإذا كان فى طريق بيتك بعد كده مستنقعات أو خرايب أو مقالب زبالة، بلغى الصحة أو الجهات المختصة فى الحال، علشان تساهمى فى حملة مكافحة الذباب، وتحفظى بلادك من هذا الوباء..!