العوضي لـالمقاول الهارب: لما أنت معاك 27 مليون ادفعهم للفقراء بدل فيلمك الفاشل

01:32 م | الاثنين 23 سبتمبر 2019

بثّ الفنان أحمد العوضي، فيديو مباشر، عبر حسابه الشخصي على "فيسبوك"، للرد على المقاول الهارب، مؤكدًا أن هذا الفيديو بثه خصيصا للحديث معه "راجل لراجل" على حد وصفه.

ابن بلد إزاي وانت من العجوزة؟

وسخر العوضي، في الفيديو من المقاول الهارب قائلًا: "أنا عامل الفيديو ده علشان عاوز أتكلم مع محمد علي، أنت راجل دلوقتي ثورجي عظيم وعايش في دور سعد زغلول، وأنا عاوزة أتكلم معاك راجل لراجل بقى علشان أنت بتقول أنك ابن بلد، وأنا معرفش ابن البلد مين ده يا بني اللي من العجوزة، أنا بعملك الفيديو ده علشان أرد على حاجات مستفزاني ومخلية الناس مصدقاك في حاجات وأنت بايع بيعة خسرانة".

عملت نمرة بفيديوهاتك.. انزل الشارع بقى مع الناس

وأضاف العوضي: "عاوز أطلب منك حاجة، أنا عاوزك تنزل مع الناس، انزل مع الناس، انت عملت نمرة وحكاية وموضوع علشان حوار إنك راجل هفأ واتنصب عليك وتمامك الشاشة اللي أنا بكلمك منها دي فإحنا بنتكلم شاشة لشاشة وراجل لراجل فأشتري مني.. أنزل مع الناس.. أنت بطل العالم في الشبحنة".

وكذب العوضي، المقاول الهارب في ادعائه انتمائه للطبقة الشعبية: "أنا معرفشي إنت جبت منين إنك ابن بلد مع إنك عيل من العجوزة، والعجوزة دي في ضهر المهندسين، يعني جنب جامعة الدولة وميدان لبنان فمش عارف امتى دي بقت منطقة شعبية، أنت مش حلو ومش راجل، والرجولة فيس تو فيس مش على الفيس".

فشلت في التمثيل.. ودفعت 4 ملايين جنيه للمنتج في آخر مسلسلاتك

وتابع العوضي: "أنت جربت التمثيل وفشلت الحمد لله رب العالمين وطلعت هبدت علينا وقعدت تقول إنك عملت فيلم بـ27 مليون جنيه علشان توصل رسالة.. لأ الرسالة في الموبايل، وممكن أكتبلك رسالة وابعتها على الموبايل، ومش مستاهلة فيلم بـ27 مليون، ولو كان قلبك على الغلابة كنت عملت بـ10 مليون بس مشروع شغلت فيه ناس، وخصصت أرباحه لناس تانية".

لو كان قلبك على الغلابة كنت عملت بـ10 ملايين بس مشروع شغلت فيه ناس

واستكمل العوضي: "أنت محدش كان يعرفك وعمر ما حد اتكلم عليك.. أنت عملت كام فيلم على كام مسلسل وآخرهم المسلسل اللي أنت دافع 4 ملايين جنيه للمنتج علشان تشتغل.. وأقسم بالله أنا ما بقول كلمة كذب".

شاهدت 3 فيديوهات فقط.. واكتشفت إنك بلح

وتابع العوضي: "أنت فتحت عاركة بينك وبين ناس معينة في البلد وبدأتها بإنك اتنصب عليك بـ220 مليون جنيه، أو 260 مليون، وجبت كام اسم لمشروعات، وبدأت الحوار بأنك عاوز تجيب حقك، وأول فيديو اعترفلك إنه خطفني، وفي تاني فيديو قعدت تقول معايا أدلة وبراهين والناس اتشعلقت أكتر بس طلعت بلح، وبعد كدا الدنيا ولعت وأنت كنت بتهاجم ناس معينة في الجهات المعنية الموكل لها تنفيذ الشغل اللي كانوا بيكلفوك بيه، وبعدين طلعت قولت أنا مش عاوز الفلوس أنا تمام أنا مع الشعب وقومت طالع مهاجم شخص الرئيس".

وواصل العوضي: "طيب هو الرئيس اللي نصب عليك؟.. أنا مدرك أنت عملته وبعدين الإخوان لقطوك ولا كنت مجهز ده بس دي مش مشكتنا.. أنت قولت عاوز فلوسك وبعدين رجعت قولت مش عاوز فلوس أنا عاوز الشعب معايا والدنيا عليت معاك ولقيناك بتنتقد الرئيس وبتقول وتتريق وتشتم".

لو الجيش فاسد اشتغلت معاه 15 سنة ليه؟

واستطرد العوضي: "فكرة إنك تشتم حد وهو مش قدامك دي مش رجولة، ده أنت أشهر ما فيك إنك فيك مني، معرفش فيك مني إزاي بس هما شافوا إنه فيك مني ودي حاجة متشرفنيش، وأنا بكلمك بالمنطق بعيدا عن مؤيد وعن معارض إنت بايع للناس إنك معاك دبلوم، والدبلوم على راسي، أنت عاوز تخاطب الناس الغلابة فأنت نازلهم أوي وبتقولهم أنا منكم وليكم".

وأضاف العوضي: "أنت بتقول إنك اشتغلت 15 سنة يعني 180 شهر قاعد بتكسب منهم، ولو هي منظومة فاسدة زي ما أنت بتقول وأنت راجل كنت سحبت نفسك من زمان، لكن دلوقتي عندك عربيات وفلل وقصور وشاليهات، وعملت فلوس، وقبل ما تسافر إسبانيا أمنت نفسك وروحت عملت شركة هناك وفيلا والفيو بتاعك بحر وبتتكلم عن الغلابة"