فيديو.. العوضي لـ"مقاول الشائعات": أنت إزاي من الغلابة وأبوك جواهرجي؟
الفنان احمد العوضي
نشر الفنان أحمد العوضي، فيديو عبر حسابه الشخصي على "فيسبوك"، يرد فيه على مقاول الشائعات محمد علي، قائلا إن الفيديو بثه خصيصا للحديث معه.
أنت من العجوزة وأبوك جواهرجي وعمرك ماكنت من الغلابة
وهاجم العوضي: "لو أنت عاوز تعمل ثورة وابن بلد وجميل طالع بتفتخر إنك بتشرب مخدرات وبتعرف ستات، الشباب الصغيرة اللي بتتفرج عليك دول المفروض يعملوا إيه.. هو أنت كدا من الغلابة اللي أنت بتتكلم عليهم؟.. أمتى كنت من الغلابة.. لا العجوزة منطقة شعبية ولا طلعت لقيت أبوك بيجري عليك أنت وأخواتك وبعدين الدولة جت عليك.. لأ أنت طالع على أب جواهرجي وأنت اللي قولت كدا، فأنت مجوعتش.. أنت كنت زي الغلابة أمتى؟.. أنت عندك 42 سنة وبتقول إنك من 15 سنة بتشتغل مع الجيش يعني من وأنت عندك 27 سنة اللي كسبت من وراه ملايين، ده في ناس عندها 27 سنة متخرجتش من الجامعة، وهو في واحد شقيان الفلوس عنده تفاهة لدرجة يعمل فيلم بـ 27 مليون جنيه.. أنت عيل فشلت كممثل وحبيت تعمل نمرة فهربت، لكن الدولة لو كانت جاية عليك زي مابتقول كانوا منعوك من السفر، ده أنت سافرت وبتقول إنك اشتغلتهم لكن كانوا عادي يجيبوك".
وأضاف العوضي: "لو ليك خناقة مع حد هنا في البلد أعملها من هنا.. ده سعد زغلول اتنفى ومحمد فريد اتنفى ومصطفى كامل مات وهو عنده 34 سنة بس الناس دي كانت بتناضل ضد الاحتلال وبريطانيا العظمى، وقعدوا فيها وماتو عليها، وفضلوا زعماء، لكن أنت عملت الستات وسافرت برة وعندك فيلا وعربيتين وكل يوم سهر وخمرة، ومحدش يقول ملناش دعوة بحياته الشخصية لأن اللي يطلع ويتكلم لازم يكون قدوة للناس".
بتقول شغال مع الجيش من 15 سنة يعني مشكلتك مع نظام مبارك ولا مع مين؟
واستكمل العوضي: "الكلام سهل.. أنزل مصر وأقف مع الناس، واللي بيقول أصله لو نزل مصر هيتقبض عليه.. أومال عاوز تبقى بطل ببلاش.. البطولة ليها ثمن، ولو اتسجنت الناس هتعرف أنك ضحيت بنفسك علشانهم.. أنت عاوز تولع البلد وبتقول أنك بقالك 15 سنة بتشتغل مع الجيش وفي فساد.. وبقالي 9 سنين مش طايق نفسي.. طيب هو الرئيس السيسي بقاله 15 سنة؟ ولا 9 سنين.. يعني أنت مشكلتك مع مين؟ مع نظام مبارك؟.. طيب كامل الوزير مكانش موجود، والأسامي اللي أنت بتقولها كلها مكانتش موجودة؟".
وتابع العوضي: "أنت عمال تهبد وتقول كلمة صح ووراهم 5 غلط فيبان أنك بتتكلم صح.. تعالى هنا ولو ليك حق تآخده.. ثورة إيه اللي هتقوم؟.. الناس غلابة.. وأنا مش طالع أطبل للنظام الناس عارفاني.. أنت عامل زي الستات وعاوز الرجالة تتخانقلك.. أنت عيل كذاب ومش تمام وعندك مرض الشهرة، وعمال تقول نفسي أرجع بلدي وانزلوا يامصريين ونفسي أرجع بلدي.. طيب لو عملوا ثورة أنت هترجع؟.. طيب هترجع تعمل ايه والـ22 مليون مش هيرجعولك وأنت مش عاوزهم، وعاوز تبقى رئيس جمهورية.. يعني أنا على آخر الزمن رئيسي يبقى بودرجي؟ ".
واستطرد العوضي: "الرئيس السيسي كان ممكن يقولك أنت عيل كذاب ومفيش حاجة، ولكن الرئيس قال فعلا أنا ببني قصور ومكذبكش ومش معنى كدا إنه كله كلامك صح.. لكن قال في الآخر على كلام معين الكلام كذب وافتراء، ماكان من الأول قال كله كذب وإفتراء".
لو قامت ثورة أنت لا هتيجي مصر ولا هتعرفنا.. فين رموز يناير؟
وتابع العوضي: "هنفترض البلد دي ولعت وعملنا الثورة هتيجي تعيش معانا؟.. ولو حد حصله حاجة هتدفع لأهله تعويض؟.. هو مش راجل ويوم ما الدنيا تيجي عليك مش هيعبرك ولا هيعرفك.. هو حد من اللي ولعها في 25 يناير موجود معانا دلوقتي أو كان موجود معانا بعدها؟.. كله عايش برة بينبسط".
واختتم العوضي الفيديو: "أنت ملكش خير في أهلك.. أنت طالع بتعادي بلدك وأهلك في البيت هنا؟.. أنت اللي زقك علينا واللي معاك واللي وراك كدا كدا هيصفيك علشان الدولة المصرية تلبسها".