أديب يفضح أحمد عطوان بطريقة كوميدية بعد شائعات حول رئيس المخابرات
عمرو أديب
عرض الإعلامي عمرو أديب، مقطع فيديو للإعلامي الإخواني الهارب أحمد عطوان، يسرد بعض المعلومات المغلوطة المليئة بالشائعات، حيث سخر أديب قائلًا: "فيه واحد إعلامي إخواني بيقول معلومات مهمة جدًا، وأنا قررت لما يكون فيه معلومات مهمة أجبهالكم هنا، عشان مفيش حاجة تستخبى عليكم".
ووفقا لما عرضه أديب، كان نص رسالة "عطوان": "ارفعوا الراية، اللواء عباس كامل رئيس المخابرات العامة، أخذ محمود السيسي وسافر إلى الإمارات هربا، هما الآن في الإمارات، غادرا من مطار القاهرة الدولي مش على متن طائرة خاصة، لا على متن طائرة بوينج تابعة للطيران الإماراتي، وهما الآن في الإمارات وليسا في مصر".
ورد أديب ساخرًا: "شوفتوا أنا بقى خوفت ازاي، رئيس المخابرات بتاعنا سابنا ومشي، وكمان ما ركبش مصر للطيران وركب طيران إماراتي، ينفع كده، وخد معاه محمود السيسي وسابني أنا هنا، طب أنا هقعد لوحدي يعني"، موضحًا أن عباس كامل موجود بصحبة الرئيس عبدالفتاح السيسي بنيويورك لحضور فعاليات الجمعية العامة للأمم المتحدة.
وعرض أديب، صورًا عديدة لعباس كامل أثناء وقوفه بجوار الرئيس، وصورًا أخرى أثناء استماعه لكلمة الرئيس السيسي في الجمعية العامة للأمم المتحدة، قائلًا: "ده بقى رجل المخابرات الشاطر المتمرس، يقدر يبقى موجود في مكانين مختلفين في وقت واحد، في نيويورك ودبي في نفس الوقت، واحد يقولي إزاي، أقوله ده شغل مخابرات بقى".
وسخر الإعلامي: "ما هي المسافة بين الإمارات وأمريكا بسيطة، كلها 18 ساعة بس، بس اللي محيرني إيه اللي يخلي عباس كامل ييجي من نيويورك وياخد محمود السيسي من مصر ويطلع على الإمارات تاني، يعني ركب ترانزيت، وكمان طيران الإماراتي يمكن عشان الوجبات في الطيارة حلوة".
وتابع أديب قائلا: "أنا مش عارف إيه الكذب ده، ده كذاب وغبي وأهبل، يا جدع لما تكون عاوز تكذب اكذب في موضوعات غير قابلة للتحقق، وآخر إشاعة شوفتها إن اللي راح نيويورك مش السيسي ده واحد شبهه وواحد شبه عباس كامل، أنا مش هتكلم أنا هقعد أضحك بس".