محمد
تأخره لساعات عن موعد الولادة المحدد له جعله غريباً بأعين كل من يراه للوهلة الأولى.
محمد عاطف، 6 سنوات، من منطقة بشتيل بالجيزة، وُلد بأذنين مغلقتين ونقص فى عظام الوجه، ما أدى إلى اختلاف شكله عن أقرانه، وحسب والده عاطف حامد: «يوم ولادته رُحت بزوجتى مستشفى فى إمبابة عشان تولد، خصوصاً إن محمد مش البكرى ده خامس طفل لينا، اتفاجئنا إنهم بيقولوا لسه بدرى على ميعاد الولادة».
ظلت الأم تصرخ من الألم، فاصطحبها الزوج إلى مستشفى آخر فى شبرا: «طلبوا منِّى أنقل لها دم، وأروح أجيب أكياس من بنك الدم فى الدقى، فرحت بيها مستشفى الدمرداش وهناك ولدت على باب المستشفى». منذ اللحظة الأولى التى رأى فيها ابنه، شعر «عاطف» بالصدمة والخوف: «كنت حاسس إنه مش طبيعى وخايف عليه، عملت له كل الفحوصات عشان نحدد المشاكل الصحية اللى عنده بالظبط».
شكله وملامحه كانت غريبة وجعلته لافت لأنظار الناس: «شكل ودانه غريب ومقفول، وتعمدت أربى له شعره عشان يدارى التشوه، ورغم إن كل الناس بتستغرب شكله، إلا أنه هو الحاجة الحلوة اللى فى حياتنا»، يتمنى «عاطف» أن يسمع صوت ابنه: «نفسى جداً خاصة إنه مش بيعانى من الصمم، هو ودانه مقفولة، ولأنه مش قادر يسمع، فطبيعى إنه مش هيعرف يتكلم».
يناشد «عاطف» وزارة الصحة أو أحد أطباء التجميل تبنِّى حالة ابنه ومساعدته على الحياة بشكل طبيعى: «نفسى يبقى طفل طبيعى ويدخل المدرسة».
تعليقات الفيسبوك