طوابير أولياء الأمور لسداد رسوم تأمين «التابلت»
أبدى كثير من أولياء الأمور انزعاجهم من إعلان وزارة التربية والتعليم عن فتح باب سداد تأمين أجهزة التابلت، فى الوقت الذى يستعد فيه الطلاب لموسم الامتحانات، حيث ازدحمت مكاتب البريد، التى يتم عن طريقها سداد مبلغ التأمين.
«ليه بس الشحططة، مرة ينزلوا قرار بدفع المصاريف، ومرة تانية دفع إعادة القيد، ومرة تالتة دفع رسوم التابلت، ما تطلع القرارات دى كلها مرة واحدة، خصوصاً إن اليوم بيضيع فى الوقوف فى الطوابير، أنا أخدت إجازة من شغلى علشان أدفع، وكل أولياء الأمور كده»، كلمات شمس الجندى، والدة طالب فى الصف الثانى الثانوى بمدرسة 6 أكتوبر الثانوية المشتركة، فيما قالت سمر بركات، والدة طالبة فى الصف الأول الثانوى بإحدى مدارس المنصورة: «التوقيت خاطئ، يعنى همّا مستنيين السنة كلها وفجأة افتكروا دلوقتى، والمدارس بتشدد على ضرورة إحضار إيصال الدفع، مع معلومة أن السيستم بيقع بسبب كثافة الإقبال، لما دفعة واحدة بتدفع، فما بالك بدفعتين، إيه المشكلة لو كان الدفع فى إجازة نصف السنة، وتسليم الإيصال لما الطلبة ترجع بعد الإجازة، بدل ما الناس تتبهدل، ومراعاة لظروف الامتحانات». جيهان مجدى دفعت العام الماضى رسوم تأمين جهاز التابلت لابنها «كريم»، وعبّرت عن ضيقها من تكرار مشهد الطوابير: «أنا جربت نار الوقفة السنة اللى فاتت فى البريد، والمشكلة مش فى الـ100 جنيه، المشكلة فى الوقفة والزحمة والبهدلة، الوقت بيضيع فى مكتب البريد، ده غير إن السيستم دايماً واقع، طب ليه ما يسهّلوش الأمر علينا، وندفع فى (فورى)، أو فى المدرسة؟!».
تعليقات الفيسبوك