الوتد.. موّال فى حضرة خيرى شلبى
شعر: زين العابدين خيرى
الأولة «السنيورة» والتانية «الأوباش»
و«اللعب خارج حلبة» الأحناش
الاسم خيرى وفى القلوب متعاش
وياما ناس بترفع اسمها بأوناش
وناس تهمّش فى ناس ماتتهنّاش
—
لكنه واحد جمع كل القلوب جوّاه
كان «الوتد» والسند عمره ما قال الآه
«أولنا كان الولد» «تالتنا الورق» ورماه
وقشّ بـ«الكومى» وبـ«زهرة الخشخاش»
الأولة «السنيورة» والتانية «الأوباش»
—
يا «صايد اللولى» يا «نعناع الجناين» عود
اكتب «وكالة عطية» وحلمنا المفقود
يا ناصفنا بعد النبى وربنا المعبود
إنت لسان الغلابة وقالولنا مانسواش
الأولة «السنيورة» والتانية «الأوباش»
——
يا راسم الأحبّة «بورتريه» وحرير
متدفّى بالثورة فى طوبة وفى أمشير
يا «طرشجى حلوجى» وبتـ«عدل المسامير»
وبتكره اللى «نسف الأدمغة» الهبّاش
الأولة «السنيورة» والتانية «الأوباش»
—
«إسطاسية» تبكى عليك ويصرّخوا «الشُّطّار»
تُلضُم «عراوى» الوطن «فرعان من الصبار»
«عم أحمد السماك» جامع صحابه كتار
بيغنوا موّال اللى راح وماجاش
الأولة «السنيورة» والتانية «الأوباش»
—
خيرى أيا شلبى يا بن حقى يا نجيب
لساها ولادة البلاد ما تخافش م الترهيب
طه جاهين حدّاد ومصر ما بتشيب
واللى يهين ذكرها لا اتولد ولا عاش
الأولة «السنيورة» والتانية «الأوباش»
أخبار متعلقة
خيرى شلبى.. عام على رحيل أمير الصعاليك والمهمشين
«الوطن» فى بيته.. هما "وحى الإبداع"
الوتد.. موّال فى حضرة خيرى شلبى
ريم تكتب عن «الأب الأنيق»
القهوة في انتظارك
موال الحياة والموت
«شباس عمير».. أسطورة «الوتد»حين تحن"أنس الحبايب"