مواطنون يستعدون لرمضان في زمن كورونا: مفيش سوق كل يوم
مواطنون يستعدون لرمضان في زمن كورونا: مفيش سوق كل يوم
مع اقتراب شهر رمضان الكريم في ظل انتشار فيروس كورونا المستجد، وما تتخذه الدولة من إجراءات احترازية للسيطرة عليه، اضطر عدد من المواطنين لتغيير ما اعتادوا عليه طوال الشهر الكريم، فمنهم من كان يتردد على السوق يوميا لشراء الأطعمة طازجة دون تخزينها، وآخرون يذهبون إليه مرتين كل أسبوع، لكن هذا العام اتفقوا على الذهاب للسوق مرة واحدة.
"كل رمضان كنت متعودة بنزل أشتري كل الطلبات مرتين أو تلاتة في الأسبوع، لكن السنة دي هحاول أخليها مرة واحدة بس".. بهذه الكلمات بدأت منى علاء، ربة منزل، في العقد الرابع من عمرها، وإحدى سكان منطقة الخلفاوى، حديثها عن تحضيراتها لرمضان الذى سيبدأ بعد أيام قليلة، بعد ما تردد لمسامعها عن خطورة الصيام في رمضان، في ظل تفشي فيروس كورونا المستجد "كوفيد 19".
تقول منى: "الفيروس بقى عامل هوس عند الناس كلها، وبعدين الصيام مهم حتى لو فيه خطر، لكن هحاول أجمع كل الطلبات قبل رمضان، عشان منزلش أكتر من مرة"، موضحة أنّها طلبت من زوجها توفير مبلغ مالي، كي تذهب للسوق صباح الخميس، لشراء ما يكفيها لمدة أسبوعين: "هنزل اشتري اللي أقدر عليه، لحد ما أشوف الدنيا هتمشي إزاي في رمضان، كورونا غير حياتنا اللي متعودين عليها، ومش عارفين هنخلص إمتى".
هناء: هحاول أجيب اللي أقدر عليه قبل رمضان عشان منزلش أكتر من مرة
على بعد خطوات قليلة من مسكن هناء حسن، 34 عاما، ربة منزل، وإحدى سكان منطقة فيصل، يستقر سوق كبير للخضار، اعتادت الذهاب إليه يوميا في رمضان، لشراء ما يلزمها، لكنها قررت تغيير عادتها بعد تفشي كورونا: "بقالي فترة بسمع كتير إن مفيش صيام السنة دي عشان كورونا، لأنها ممكن تيجي للشخص أثناء صيامه، عشان كده قررت أشتري كل حاجتي قبل رمضان بيومين".
حصلت هناء على مبلغ من زوجها، وقررت النزول إلى السوق صباح الأربعاء: "مرضتش انزل السوق النهاردة عشان أكيد هيكون زحمة، بعد قفله 4 أيام، عشان كده قلت انزل لما الدنيا تروق شوية"، وأنهت: "ربنا معانا ويقدرنا نعدى الأزمة دي على خير، ويكون رمضان كريم على الكل".
لم يختلف الوضع كثيرا عند أبرار الشربيني، في أواخر العشرينات، مهندسة مدنية، تقطن في حي مصر الجديدة، إذ إعتادت على شراء ما تحتاجه في رمضان عند عودتها من عملها، لكنها غيرت خطتها هذا العام بسبب كورونا، إذ قررت شراء ما تحتاجه مرة كل أسبوع: "كده كده في رمضان بروح شغلي، وكنت بشتري حاجتي وأنا راجعة، لكن السنة دي مش هعمل كده".
أبرار: رمضان السنة دي صعب.. ومحتاج وعي من الناس عشان تحافظ على نفسها
وأوضحت أنّها حال احتاجت شيئا آخر، ستهاتف أحد البائعين بالسوق لإرسال الطلب لها مع أحد العاملين بالمحل: "السوق طول الوقت زحمة، ممكن أبقى انزل بعد الفطار اشترى حاجتي، أو اطلب الحاجة دليفري، رمضان السنة دي أصعب من كل سنة، ومحتاج وعي من الناس عشان تقدر تحافظ على نفسها".
