بالتزامن مع رفع العزل الصحى عن قرية المعتمدية التابعة لمحافظة الجيزة، بعد انتهاء الـ14 يوماً، أطلق بعض المتطوعين فى القرية حملة «كأنك فى العزل»، لحث الأهالى على الالتزام بمنازلهم وعدم الخروج إلا للعمل والضرورة القصوى، وعدم الوجود بكثافة فى الأسواق الشعبية.
«مش عايزين الناس ترجع تتعامل باستهتار، خاصة وإحنا داخلين على شهر رمضان»، قالها عبدالرحمن عنب، أحد السكان، ومسئول المبادرة، مؤكداً أنه طالب الأهالى بمنع الزيارات العائلية فى رمضان: «فيه ناس كتير ممكن ترجع تمارس حياتها باستهتار وفاكرين الفيروس ممكن مايرجعش تانى وده غلط عشان كده عملت الحملة وكتبت تعليمات للناس على الجروب الخاص بالقرية على الفيس بوك».
يساعده بعض المتطوعين بالحملة، من خلال تخفيف الزحام بالأسواق وأمام المخابز: «فيه معانا متطوعين دورهم أنهم يقفوا فى مداخل القرية زى الشرطة عشان يمنعوا دخول أى غريب عن القرية إلا للضرورة بس». وعلى الرغم من التشديدات التى فرضتها الحملة، وجد «عبدالرحمن»، التزاماً كبيراً من السكان، الذين وجدوا فى الشوارع والأسواق بأعداد محدودة، كما التزموا بساعات الحظر: «زى ما إحنا مستمرين فى توصيل الخضار للسكان لحد البيت عشان محدش ينزل من البيت»، وكذلك يقوم بتطهير وتعقيم الشوارع، وأيضاً مداخل العمارات والمحلات والمدارس بالمنطقة: «فيه مننا اللى مش بيروح شغل خالص واللى بيشتغل من بيته بيخلص وينزل يساعدنا وبنقسم بعض كل اتنين بيمسكوا شارع ينضفوه ويعقموه والصراحة الجيران بتساعدنا كمان وملتزمة معانا من أول ما دخلنا الحجر الصحى لحد ما خرجنا منه وكل ده عشان كلنا عايزين ماندخلش فى الدوامة دى تانى».
تعليقات الفيسبوك